បណ្ឌិត ជា ចាន់តូ៖ សុខភាពជាបញ្ហាចម្បងរបស់មនុស្សគ្រប់រូប មានសុខភាពល្អ គឺមានអ្វីៗគ្រប់យ៉ាង
ភ្នំពេញ៖ ឯកឧត្តមបណ្ឌិត ជា ចាន់តូ ទេសាភិបាលធនគារជាតិនៃកម្ពុជា បានលើកឡើងថា សុខភាពជាបញ្ហាចម្បងរបស់មនុស្សគ្រប់រូប មានសុខភាពល្អ គឺមានអ្វីៗគ្រប់យ៉ាង សូមបងប្អូនប្រជាពលរដ្ឋទាំងអស់ ត្រូវរក្សាសុខភាពឲ្យបានល្អជាប្រចាំ។
ឯកឧត្តមបានលើកឡើងបែបនេះ ក្នុងពេលអញ្ជើញចូលរួមជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឲ្យប្រើប្រាស់អគារ និងសមិទ្ធផលនានាក្នុងមណ្ឌលសុខភាពតាំងក្រសាំង ស្ថិតនៅឃុំតាំងក្រសាំង ស្រុកសន្ទុក ខេត្តកំពង់ធំ កាលពីព្រឹកថ្ងៃទី១២ ខែមិថុនា ឆ្នាំ២០២៣។
ឯកឧត្តមបណ្ឌិត ជា ចាន់តូ ទេសាភិបាលធនគារជាតិ នៃកម្ពុជា បានមានប្រសាសន៍ថា អគារមណ្ឌលសុខភាពតាំងក្រសាំងនេះ គឺជាសមិទ្ធផលថ្មីមួយបន្ថែមទៀត សម្រាប់ប្រជាពលរដ្ឋ ក្នុងការទទួលបានសេវាសុខភាពប្រកបដោយគុណភាព សុវត្ថិភាព និងប្រសិទ្ធភាព ដែលបានរួមចំណែកអភិវឌ្ឍវិស័យសុខាភិបាលឱ្យកាន់តែរីកចម្រើន ស្របតាមគោលនយោបាយរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។
ឯកឧត្តមបណ្ឌិត ជា ចាន់តូ បានបន្តទៀតថា សុខភាពជាបញ្ហាចម្បងរបស់មនុស្សគ្រប់រូប មានសុខភាពល្អ គឺមានអ្វីៗគ្រប់យ៉ាង សូមបងប្អូនប្រជាពលរដ្ឋទាំងអស់ ត្រូវរក្សាសុខភាពឲ្យបានល្អជាប្រចាំដោយត្រូវមានការរស់នៅស្អាត មានអនាម័យ ការហូបចុកគ្រប់គ្រាន់ និងការធ្វើលំហាត់ប្រាណឲ្យបានទៀងទាត់។ ទោះជាយ៉ាងណាក៏ដោយ ការអនុវត្តបែបនេះ មិនមែនមានន័យថាយើងមិនឈឺនោះទេ ។ លើសពីនេះទៀត ត្រូវមានការពិនិត្យសុខភាពជាប្រចាំ និងការតាមដានសុខភាពនៅពេលយើងឈឺ ដោយទៅជួបគ្រូពេទ្យ នឹងអាចជួយឲ្យស្ថានភាពបានប្រសើរឡើង សមដូចពាក្យបុរាណមួយបានពោលថា(ការពារប្រសើរជាព្យាបាល)។
ឯកឧត្តមបណ្ឌិត ជា ចាន់តូ ទេសាភិបាលធនគារជាតិនៃកម្ពុជា និងលោកជំទាវ ខៀវ ស៊ីណា បានថ្លែងអំណរគុណដល់ ញាតិមិត្តជិតឆ្ងាយ បានរួមគ្នាសាងសង់មណ្ឌលសុខភាព ដើម្បីទុកជាប្រយោជន៍រួមសម្រាប់បងប្អូនប្រជាពលរដ្ឋយើងទាំងអស់គ្នា និងសូមថ្លែងអំណរគុណ ចំពោះសប្បុរសជនទាំងអស់ ជាពិសេសធនាគារអ៊ូរី ដែលតែងតែចូលរួមចំណែកក្នុងកិច្ចការអភិវឌ្ឍសង្គម ក្នុងការផ្តល់ជាថវិកាសម្រាប់កសាងមណ្ឌលសុខភាពមួយនេះ ជូនដល់បងប្អូនប្រជាពលរដ្ឋយើងទាំងអស់ និងខិតខំថែរក្សាការពារសមិទ្ធផលនេះឲ្យបានគង់វង្ស ទុកជាសម្បត្តិរួមតរៀងទៅ៕
