ឯកឧត្តមបណ្ឌិត ហ៊ុន ម៉ាណែត និងលោកជំទាវ ឧបត្ថម្ភអំណោយដល់ប្រជាពលរដ្ឋក្រីក្រ ក្នុងស្រុកបរិបូណ៌

ភ្នំពេញ៖ ឧត្តមសេនីយ៍ត្រី អ៊ុំ សុភា មេបញ្ជាការតំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត កាលពីថ្ងៃទី១៣ ខែមិថុនា ឆ្នាំ២០២៣ បានដឹកនាំក្រុមការងារមនុស្សធម៌ និងក្រុមការងារយោធិននារីរបស់អង្គភាព សហការជាមួយអាជ្ញាធរមូលដ្ឋាន នាំយកស័ង្កសីចំនួន ៣០សន្លឹក អង្ករ គ្រឿងឧបភោគបរិភោគ រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ ឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុនី ឧបត្ថម្ភដល់លោកយាយ ភួង ចន អាយុ៧៣ឆ្នាំ ដែលជាស្រី្តមេម៉ាយចាស់ជរា ត្រូវចិញ្ចឹម ចៅតូចៗចំនួន០៤នាក់ នៅភូមិទួលរកា ឃុំមេលំ ស្រុកបរិបូណ៌ ខេត្តកំពង់ឆ្នាំង ។

ឯកឧត្តម មេបញ្ជាការ បានពាំនាំប្រសាសន៍ផ្តាំផ្ញើសួរសុខទុក្ខពីសំណាក់ ឯកឧត្តម បណ្ឌិត ហ៊ុន ម៉ាណែត និងលោកជំទាវ ជូនចំពោះលោកយាយ ភួង ចន។ ឯកឧត្តម បានបន្តថា ឯកឧត្តម បណ្ឌិត ហ៊ុន ម៉ាណែត និងលោកជំទាវ តែងតែគិតគូរពីសុខទុក្ខរបស់បងប្អូនប្រជាពលរដ្ឋ គ្រប់ទីកន្លែង គ្រប់កាលៈទេសៈទាំងអស់ ។

ដោយពិនិត្យឃើញជាក់ស្តែងពីភាពលំបាករបស់លោកយាយជរា ឧត្តមសេនីយ៍ត្រី អ៊ុំ សុភា បានណែនាំដល់មេបញ្ជាការផ្នែកសឹករងស្រុកបរិបូណ៌ អាជ្ញាធរមូលដ្ឋាន លោកមេភូមិទួលរកា ត្រូវចុះឲ្យជាប់ និងជួយសាងសង់លំនៅឋានជូនលោកយាយរស់នៅឲ្យបានសមរម្យ ។ ប្រសិនបើមានការខ្វះខាត ត្រូវរាយការណ៍មក ទីបញ្ជាការខេត្ត ឯកឧត្តម នឹងបន្តឧបត្ថម្ភទាំងសម្ភារ:ស័ង្កសី ព្រមទាំងគ្រឿងសម្រាប់ហូបចុកបន្ថែមទៀត ។

លោកយាយ ភួង ចន មានការសប្បាយចិត្ត ព្រមទាំងបានថ្លែងអំណរគុណយ៉ាងជ្រាលជ្រៅជាទីបំផុតជូនចំពោះ ឯកឧត្តម បណ្ឌិត ហ៊ុន ម៉ាណែត និងលោកជំទាវ ព្រមទាំង ឯកឧត្តម មេបញ្ជាការ តំបន់ប្រតិបត្តិការសឹករងខេត្ត និងក្រុមការងារដែលបានយកចិត្ដទុកដាក់គិតគូរអំពីសុខទុក្ខរបស់លោកយាយ និង ចៅៗ ដែលជួបការលំបាកខ្លាំងក្នុងជីវភាពរស់នៅប្រចាំថ្ងៃ និងសូមគោរពជូនពរ ឯកឧត្តម លោកជំទាវ និងក្រុមការងារ សូមមានសុខភាពល្អ ប្រកបបាននូវពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។