ឧបនាយករដ្ឋមន្ត្រី យឹម ឆៃលី អនុញ្ញាតឱ្យ ប្រធានអង្គការហែលឡិន ឃេលឺ Hellen Keller អន្តរជាតិ ចូលជួបសម្តែងការគួរសម និងពិភាក្សាការងារ

ឯកឧត្តមវេជ្ជបណ្ឌិត យឹម ឆៃលី ឧបនាយករដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានគណៈកម្មាធិការជាតិជំរុញចលនាភូមិមួយផលិតផលមួយ នាព្រឹកថ្ងៃព្រហស្បតិ៍ ១២រោច ខែជេស្ឋ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៥ ខែមិថុនា ឆ្នាំ២០២៣ បានអនុញ្ញាតឱ្យ លោក សន ប៊ែកឃឺ (Shawn Baker) ប្រធានអង្គការហែលឡិន ឃេលឺ Hellen Keller អន្តរជាតិ ចូលជួបសម្តែងការគួរសម និងពិភាក្សាការងារ។ ជំនួបនេះ ប្រព្រឹត្តទៅនៅទីស្តីការគណៈរដ្ឋមន្ត្រី ដោយមានការអញ្ជើញចូលរួមពីថ្នាក់ដឹកនាំក្រុមប្រឹក្សាស្តារអភិវឌ្ឍន៏វិស័យកសិកម្ម និងជនបទជាច្រើនរូប។

ក្នុងឱកាសចូលជួបសម្តែងការគួរសម ​និងពិភាក្សាការងារជាមួយឯកឧត្តមឧបនាយក​រដ្ឋមន្រ្តី លោក សន ប៊ែកឃឺ (Shawn Baker) បានមានប្រសាសន៏ថា កម្ពុជា មិនគ្រាន់តែទទួលជោគជ័យ និងផលប្រយោជន៏ពីគម្រោងនានាក្រោមកិច្ចសហការ និងជំនួយពីដៃគូអភិវឌ្ឍន៏ប៉ុណ្ណោះទេ ប៉ុន្តែថែមទាំងបានធ្វើជាគំរូដ៏ល្អសម្រាប់ប្រទេសនានាលើសកលលោក យកទៅអនុវត្តតាម ដើម្បីធ្វើឲ្យប្រសើរឡើងនូវសន្តិសុខស្បៀង អាហារូបត្ថម្ភ ទឹកស្អាត និងអនាម័យ។

ក្នុងឱកាសនោះដែរ ឯកឧត្តមវេជ្ជបណ្ឌិត យឹម ឆៃលី ឧបនាយករដ្ឋមន្ត្រី បានថ្លែងអំណរគុណដល់អង្គការហែឡិន ឃេលឺ Hellen Keller អន្តរជាតិ ដែលបានផ្តល់ជំនួយ ក៏ដូចជាធ្វើកិច្ចសហការល្អជាមួយក្រុម​ប្រឹក្សា​ស្តារ​អភិវឌ្ឍន៏វិស័យកសិកម្មនិងជនបទ ក្នុងការលើកកម្ពស់សន្តិសុខស្បៀង​ និងអាហារូបត្ថម្ភនៅកម្ពុជា ដែលជាការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ៕