កម្ពុជានាំចេញអង្ករជាលើកដំបូង ទៅហ្វីលីពីន ក្រោយព្យាយាមចាប់យកទីផ្សារអស់ជាច្រើនឆ្នាំ
ភ្នំពេញ៖ ឯកឧត្ដម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មបានបញ្ជាក់ថា កម្ពុជាបានចាប់ផ្តើមនាំចេញអង្ករជាលើកដំបូង ទៅប្រទេសហ្វីលីពីន ដែលជាប្រទេសនាំចូលអង្ករដ៏ធំមួយ នៅតំបន់អាស៊ី ក្រោយពីកម្ពុជាព្យាយាមចាប់យកទីផ្សារនេះជាច្រើនឆ្នាំ។
ឯកឧត្ដម ប៉ាន សូរស័ក្ដិបានឱ្យដឹងថា ហ្វីលីពីន គឺជាទីផ្សារល្អ ដោយប្រទេសនេះមានតម្រូវការអង្ករច្រើន ហើយបច្ចុប្បន្ននេះ ប្រទេសនេះកំពុងមានការខ្វះខាតស្បៀង។
ឯកឧត្ដមបានគូសបញ្ជាក់ថា ការនាំចេញទៅកាន់ប្រទេសហ្វីលីពីនជាលើកដំបូងនេះ បន្ទាប់ពីហ្វីលីពីន បានដូរគោលនយោបាយនៃការនាំចូលអង្ករ ពោល គឺពីការនាំចូលតាមរយៈរដ្ឋ មកឯកជនវិញ។ ស្របជាមួយគ្នា នាយករដ្ឋមន្រ្តីថ្មីនៃប្រទេសហ្វីលីពិន គឺធ្លាប់ជារដ្ឋមន្រ្តីក្រសួងកសិកម្ម ដែលជំរុញឱ្យកម្ពុជាធ្វើការងារជិតស្និតជាមួយលោក និងឈានទៅដល់ការនាំចូលអង្ករពីកម្ពុជា ជាលើកទី១។
ឯកឧត្ដមមានប្រសាសន៍ថា “នេះចំណុចមួយចាប់ផ្តើម សង្ឃឹមថានឹងមានចំនួនច្រើន ដោយសារប្រទេសហ្វីលីពីន ជាប្រទេសមួយដែលត្រូវការអង្ករ ហើយលោកឃើញថាអង្កររបស់យើងល្អ មានរសជាតិឆ្ងាញ់ ហើយមានតម្លៃសមរម្យ និងមាននាំចេញច្រើន”។
យោងតាមរបាយការណ៍របស់សហព័ន្ធស្រូវអង្ករកម្ពុជាបានឱ្យដឹងថា នៅដើមឆ្នាំ២០២៣នេះ កម្ពុជាទើបតែនាំចេញអង្ករ ក្នុងបរិមាណធំលើកទី១ចំនួន ២ ៥៧៥តោនទៅប្រទេសហ្វីលីពិន។
បើតាមរដ្ឋមន្រ្តីក្រសួងពាណិជ្ជកម្ម ក្រៅពីការនាំចេញទៅប្រទេសហ្វីលីពីន ជាលើកដំបូង កម្ពុជាក៏បានចាប់ផ្តើមសាកល្បងនាំចេញ ទៅប្រទេសសិង្ហបុរីផងដែរ ប៉ុន្តែក្នុងបរិមាណតិចនៅឡើយ។
សូមបញ្ជាក់ផងដែរថា ប្រទេសហ្វីលីពីន ជាប្រទេសផលិតស្រូវ ហើយក៏ជាប្រទេសនាំចូលអង្ករដ៏ធំមួយ នៅក្នុងតំបន់អាស៊ីផងដែរជាក់ស្តែងក្នុងឆ្នាំ២០២២ កន្លងទៅប្រទេសហ្វីលីពីន បាននាំចូលអង្ករចំនួន ៣.៨២លានតោន ពីប្រទេសនានា ដែលប្រភេទអង្ករភាគច្រើនបំផុត ជាប្រភេទអង្ករសធម្មតា៕
