លោកជំទាវ ញ៉ែម សាខន សខេង អញ្ជើញជួបសំណេះសំណាល និងសួរសុខទុក្ខក្រុមយុវជនស្រុកថ្មគោល ចំនួន ១,០០០នាក់
ភ្នំពេញ៖ លោកជំទាវ ញ៉ែម សាខន សខេង ព្រមទាំងឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា និងលោកជំទាវ តំណាងដ៏ខ្ពង់ខ្ពស់របស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ប្រធានក្រុមការងារចុះមូលដ្ឋានខេត្តបាត់ដំបង និងព្រៃវែង នាព្រឹកថ្ងៃអាទិត្យ ១កើត ខែបឋមាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨ ខែមិថុនា ឆ្នាំ២០២៣ បានអញ្ជើញជួបសំណេះសំណាល និងសួរសុខទុក្ខក្រុមយុវជនស្រុកថ្មគោល ចំនួន ១,០០០នាក់។
ពិធីនេះមានការអញ្ជើញចូលរួមពីសំណាក់ ឯកឧត្តម ភូ ពុយ អ្នកតំណាងរាស្រ្តមណ្ឌលបាត់ដំបង ឯកឧត្តម ខាន់ ម៉ាណេរ រដ្ឋលេខធិការក្រសួងសាធារណការ និងដឹកជញ្ជូន ព្រមទាំងឯកឧត្តម លោកជំទាវ អស់លោក លោកស្រី ជាសមាជិកក្រុមការងារស្រុក ក្រុមក្រឡាហោមមនុស្សធម៌ ក្រុមអ្នកម្តាយមនុស្សធម៌ និងមន្រ្តីរាជការជុំវិញសាលាស្រុកថ្មគោល ជាច្រើនរូបទៀត។
ឯកឧត្តម ស សុខា បានជម្រាបជូនអង្គពិធី អំពីការផ្ដាំផ្ញើសួរសុខទុក្ខពីសម្តេចតេជោ ហ៊ុន សែន នាយករដ្ឋមន្ត្រី និងសម្តេចក្រឡាហោម ស ខេង និងបានជម្រាបជូនអង្គពិធីអំពីការរីកចម្រើនរបស់ប្រទេសជាតិ ជាពិសេសជោគជ័យនៃព្រឹត្តការណ៍ស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ក្រោមការដឹកនាំដ៏ឈ្លាសវៃរបស់សម្តេចតេជោ។
នាឱកាសនោះដែរ លោកជំទាវ ញ៉ែម សាខន សខេង ព្រមទាំងឯកឧត្តម ស សុខា និងលោកជំទាវ បានផ្ដល់ជូនក្រុមការងារយុវជនស្រុកថ្មគោល ទាំង ១,០០០នាក់ ដោយក្នុងម្នាក់ៗទទួលបានសម្លៀកបំពាក់កីឡាចំនួនមួយកំប្លេ និងថវិកាចំនួន ៥មុឺនរៀលផងដែរ ៕
