មន្ត្រីជាន់ខ្ពស់អត្តសញ្ញាណកម្ម ពន្យល់អំពីការដាក់ពាក្យស្នើសុំបញ្ចូលអក្សរឡាតាំងនៅក្នុងបញ្ចីអត្រានុកូលដ្ឋាន

ភ្នំពេញ៖ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានពន្យល់អំពីការដាក់ពាក្យស្នើសុំបញ្ចូលអក្សរឡាតាំងនៅក្នុងបញ្ចីអត្រានុកូលដ្ឋាន (សំបុត្រកំណើត សំបុត្របញ្ជាក់កំណើត សំបុត្រអាពាហ៍ពិពាហ៍ សំបុត្រមរណភាព) សាមីខ្លួនត្រូវភ្ជាប់មកជាមួយនូវ ឯកសារអត្រានុកូលដ្ឋានច្បាប់ដើម ឯកសារដែលមានអក្សរឡាតាំង ដូចជា អត្តសញ្ញាណប័ណ្ណសញ្ជាតិខ្មែរ កាតមន្ត្រីរាជការ សញ្ញាបត្រ កាតសិស្ស និស្សិត ឬឯកសារផ្សេងៗទៀតដែលមានអក្សរឡាតាំង។

ឯកឧត្តម ឧត្តមសេនីយ៍ឯក សាយ ម៉េង បានបញ្ជាក់ថា សាមីខ្លួន ឬអាណាព្យាបាល ឬញាតិដែលរស់នៅ ក្នុងផ្ទះជាមួយ អាចមកដាក់ពាក្យស្នើសុំបញ្ជូលអក្សរឡាតាំង ក្នុងបញ្ជីអត្រានុកូលដ្ឋានរបស់ខ្លួន នៅរៀងរាល់ ម៉ោងធ្វើការ នៅទីតាំងដូចខាងក្រោម៖
១-នាយកដ្ឋានអត្រានុកូលដ្ឋាន នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ ដែលមានអាសយដ្ឋាន នៅផ្លូវជាតិលេខ១ សង្កាត់និរោធ ខណ្ឌច្បារអំពៅ រាជធានីភ្នំពេញ (ទល់មុខបុរីប៉េង ហួត បឹងស្នោ)
២-សាលាក្រុង ស្រុក ខណ្ឌ នៃទីតាំងដែលបញ្ជីអត្រានុកូលដ្ឋានរបស់សាមីខ្លួនបាននឹងកំពុងរក្សាទុក។

សូមជម្រាបជូនថា សម្រាប់ព័ត៌មានផ្សេងៗ សូមទំនាក់ទំនងផ្ទាល់នៅនាយកដ្ឋានអត្រានុកូលដ្ឋាន ដែលមានអាសយដ្ឋាននៅផ្លូវជាតិលេខ១ ទល់មុខបុរីប៉េង ហួត បឹងស្នោ ឬទាក់ទងមកមន្ត្រីប្រចាំការសេវាកម្មអត្តសញ្ញាណកម្ម និងប្រតិកម្មរហ័ស រៀងរាល់ម៉ោងធ្វើការ ពីថ្ងៃច័ន្ទ ដល់សុក្រ តាមរយៈលេខទូរស័ព្ទ ១២៧១/ ០១៧ ៨៩៨ ៩១៥ ៕