នាយឧត្តមសេនីយ៍ កែវ វណ្ណថន ទទួលជួបពិភាក្សាការងារជាមួយ អគ្គនាយករង នៃអគ្គនាយកដ្ឋានកិច្ចការកុងស៊ុល នៃក្រសួងការបរទេសថៃ

ភ្នំពេញ៖ ឯកឧត្តម នាយឧត្តមសេនីយ៍ កែវ វណ្ណថន អគ្គនាយករងអន្តោប្រវេសន៍ តំណាងដ៏ខ្ពង់ខ្ពស់ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ នាព្រឹកថ្ងៃពុធ ៤កើត ខែបឋមសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២១ ខែមិថុនា ឆ្នាំ២០២៣ បានអនុញ្ញាតឲ្យឯកឧត្តម NARUCHAI NINNAD អគ្គនាយករង នៃអគ្គនាយកដ្ឋានកិច្ចការកុងស៊ុល នៃក្រសួងការបរទេស ព្រះរាជាណាចក្រថៃ ព្រមទាំងសហការី ចូលជួបសម្តែងការគួរសម និងពិភាក្សាការងារ នៅអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ដោយមានការចូលរួមពីប្រធាននាយកដ្ឋានស៊ើបអង្កេតនិងអនុវត្តនីតិវិធី អនុប្រធាន នាយការិយាល័យផងដែរ។

ជាកិច្ចចាប់ផ្តើម ឯកឧត្តម នាយឧត្តមសេនីយ៍ កែវ វណ្ណថន បានមានមតិស្វាគមន៍ចំពោះគណៈប្រតិភូក្រសួងការបរទេស នៃព្រះរាជាណាចក្រថៃ ដែលបានមកបំពេញបេសកកម្មនៅព្រះរាជាណាចក្រកម្ពុជា និងវាយតម្លៃខ្ពស់ចំពោះកិច្ចសហប្រតិបត្តិការរវាងប្រទេសទាំងពីរ ជាពិសេសរវាងអគ្គនាយកដ្ឋានអន្តោ ប្រវេសន៍ និងស្ថានទូតថៃប្រចាំនៅកម្ពុជា។

ឯកឧត្តម NARUCHAI NINNAD ក្នុងនាមខ្លួនលោកផ្ទាល់ ក៏ដូចជាពាំនាំការថ្លែងអំណរគុណពីសំណាក់ឯកឧត្តម ឯកអគ្គរាជទូតថៃប្រចាំនៅកម្ពុជា ចំពោះអគ្គនាយកដ្ឋានអន្តោប្រវេសន៍ ដែលបានរួមចំណែកនិងដើរតួនាទីយ៉ាងសំខាន់ក្នុងការផ្តល់កិច្ចគាំពារនិងសង្គ្រោះជនជាតិថៃដែលបានរងគ្រោះនៅកម្ពុជានិងបានជួយសម្របសម្រួលបញ្ជូនត្រឡប់ទៅប្រទេសថៃវិញបានឆាប់រហ័សនាពេលកន្លងមក។

ភាគីទាំងពីរ ឯកភាពបន្តកិច្ចសហប្រតិបត្តិការឲ្យកាន់តែជិតស្និតថែមទៀត និងបង្កើនការផ្លាស់ប្តូរព័ត៌មានទៅវិញទៅមកឲ្យកាន់តែមានប្រសិទ្ធភាព ដើម្បីទប់ស្កាត់បទល្មើសឆ្លងដែនទាន់ពេលវេលា រួមចំណែករក្សាការពារសន្តិសុខ សុវត្ថិភាពនៃប្រទេសទាំងពីរ ៕