ឯកឧត្តម លន់ លឹមថៃ អំពាវនាវឲ្យបងប្អូនប្រជាពលរដ្ឋ ទៅចូលរួមបោះឆ្នោតឲ្យបានគ្រប់ៗគ្នា នាថ្ងៃ២៣ កក្កដា
ភ្នំពេញ៖ ឯកឧត្តម លន់ លឹមថៃ តំណាងរាស្ត្រមណ្ឌលខេត្តកំពង់ចាម និងជាលេខាធិការគណៈកម្មការទី៣ នៃរដ្ឋសភា តំណាង ឯកឧត្តមនាយករងខុទ្ទកាល័យសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាអនុប្រធានក្រុមការងារថ្នាក់ជាតិចុះមូលដ្ឋានខេត្តកំពង់ចាម នៅថ្ងៃទី២៣ ខែមិថុនា ឆ្នាំ២០២៣ បានអញ្ជើញជាអធិបតីនៅក្នុងពិធីសម្ពោធដាក់អោយប្រើប្រាស់អគារសិក្សា និងអគារទីចាត់ការនៅសាលាបឋមសិក្សា ប៊ុន រ៉ានី ហ៊ុនសែន ថ្នល់បែក ស្ថិតនៅក្នុងភូមិថ្នល់បែកជើង ឃុំស្វាយទាប ស្រុកចំការលើ ខេត្តកំពង់ចាម ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។
ក្នុងឱកាសនោះ ឯកឧត្តម លន់ លឹមថៃ បានពាំនាំនូវការផ្តាំផ្ញើសួរសុខទុក្ខពីសំណាក់សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចតេជោនាយករដ្ឋមន្ត្រី ទៅកាន់បងប្អូនប្រជាពលរដ្ឋទាំងអស់ផងដែរ។
ទន្ទឹមនឹងនោះ ឯកឧត្តម ក៏បានលើកឡើងអំពីវឌ្ឍនភាព និងការរីកចម្រើនឥតឈប់ឈរលើគ្រប់វិស័យក្នុងសម័យសន្តិភាពនេះ ជាក់ស្តែងអគារសិក្សា និងសាលារៀននៅទីនេះ ក៏ដូចជាសាលារៀន និងសមិទ្ធផលនានា ជាច្រើនទៀតដែលកំពុងរីកដុះដាលស្អេកស្កះពាសពេញផ្ទៃប្រទេសរាល់ថ្ងៃនេះ វាកើតចេញពីកត្តាសន្តិភាព និងការដឹកនាំដ៏ល្អនិងឈ្លាសវៃរបស់ប្រមុខដឹកនាំកម្ពុជា។
ឯកឧត្តមបានបន្តថា ដោយនៅថ្ងៃទី២៣ ខែកក្កដា ឆ្នាំ២០២៣នេះ គឺជាពេលវេលាត្រូវបោះឆ្នោតជ្រើសតាំងតំណាងរាស្ត្រនីតិកាលទី៧ផងនោះ ឯកឧត្តម ក៏បានសំណូមពរអោយប្រជាពលរដ្ឋទាំងអស់ រួមគ្នាក៏ដូចជាបន្តនូវការគាំទ្រដល់ការដឹកនាំរបស់សម្តេចតេជោធ្វើជានាយករដ្ឋមន្ត្រីជាបន្តទៅទៀត និងគាំទ្រ ឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគត ដើម្បីដឹកនាំប្រទេសកម្ពុជា អោយកាន់តែមានការរីកចម្រើន។
ឯកឧត្តម លន់ លឹមថៃ ក៏បានថ្លែងអំណរគុណដល់មន្ត្រីរាជការ និងបងប្អូនប្រជាពលរដ្ឋទាំងអស់ដែលបានរួមគ្នាក្នុងការការពារនូវសុខសន្តិភាព ហើយជាពិសេសឯកឧត្តមក៏បានអរគុណដល់លោកគ្រូ អ្នកគ្រូ ចំពោះកិច្ចខិតខំប្រឹងប្រែង ក្នុងការបង្ហាត់បង្រៀនដល់សិស្សានុសិស្សអោយទទួលបាននូវចំណេះដឹង និងបណ្តុះបណ្តាលនូវធនធានមនុស្សបានយ៉ាងច្រើនដើម្បីរួមគ្នាក្នុងការអភិវឌ្ឍប្រទេសជាតិរបស់យើងអោយកាន់តែមានភាពរីកចម្រើនជាបន្តទៅទៀត ៕
