កម្លាំងសមត្ថកិច្ចជិត១០ម៉ឺននាក់ ត្រៀមការពារសន្តិសុខកំលុងឃោសនាបោះឆ្នោត ការបោះឆ្នោត និងរាប់សន្លឹកឆ្នោត

ភ្នំពេញ៖ ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិបានឱញយដឹងថា កម្លាំងសមត្ថកិច្ចប្រមាណជិត១០ម៉ឺននាក់ បានត្រៀមសម្រាប់ការពារសន្តិសុខ សណ្តាប់ធ្នាប់ យុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ដែលមានរយៈពេល២១ថ្ងៃ គឺចាប់ពីថ្ងៃទី១ ខែកក្កដា ដល់ថ្ងៃទី២១ ខែកក្កដា ឆ្នាំ២០២៣ និងការបោះឆ្នោតជ្រើសតំាងតំណាងរាស្ត្រនៅថ្ងៃទី២៣ ខែកក្កដា ខាងមុខនេះ។

ឧត្តមសេនីយ៍ឯក ឆាយ គឹមខឿន បន្តថា ចំណោមកម្លាំងសមត្ថកិច្ចជិត១០ម៉ឺននាក់នេះ គឺសម្រាប់ការឃោសនាបោះឆ្នោតប្រើប្រាស់កម្លាំងតែជាង២ម៉ឺននាក់តែប៉ុណ្ណោះ និងកម្លាំងជាង៧ម៉ឺននាក់ សម្រាប់ការពារនៅថ្ងៃបោះឆ្នោត និងរាប់សន្លឹកឆ្នោត ហើយមានត្រៀមកម្លាំងអន្តរាគមន៍នៅតាមមូលដ្ឋានសរុបប្រមាណជាង៦ពាន់នាក់ និងមានត្រៀមកម្លាំងថ្នាក់ជាតិប្រមាណជាង១ពាន់នាក់ទៀត ដើម្បីត្រៀមចេញប្រតិបត្តិការនៅក្នុងករណីមានហេតុការណ៍ចៃដន្យយថាហេតុកើតឡើងក្នុងដំណាក់កាលឃោសនាបោះឆ្នោត ការបោះឆ្នោត និងរាប់សន្លឹកឆ្នោត។

អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានមានប្រសាសន៍ថា ចំនួនកម្លាំងសន្តិសុខសម្រាប់ការពារយុទ្ធនាការឃោសនាបោះឆ្នោត ពីថ្ងៃទី១ ខែកក្កដា ដល់ថ្ងៃទី២១ ខែកក្កដា និងការបោះឆ្នោតជ្រើសតាំងតំណាងរាស្ត្រ នីតិកាលទី៧ ដែលនឹប្រព្រឹត្តទៅនៅថ្ងៃទី២៣ ខែកក្កដា ខាងមុខនេះ គឺមានចំនួនសរុបប្រមាណជិត១០ម៉ឺននាក់ ដោយក្នុងនោះមានកងកម្លាំងនគរបាល កងរាជអាវុធហត្ថ កងយោធពលខេមរភូមិន្ទ និងមានកម្លាំងជាកម្លាំងជំនួយ គឺកម្លាំងរបស់ប្រជាការពារ។ ជាគោលការណ៍កម្លាំងកងរាជអាវុធហត្ថ និងកម្លាំងកងយោធពលខេមរភូមិន្ទ គឺជាកម្លាំងការពារភូមិសាស្ត្រខាងក្រៅ គឺជួយអន្តរាគមន៍នៅតាមភូមិសាស្ត្រនីមួយៗ។ ដោយឡែកកម្លាំងការពារផ្ទាល់ គឺកម្លាំងនគរបាល។

ឧត្តមសេនីយ៍ឯក ឆាយ គឹមខឿន បានបន្តថា កម្លាំងទាំងអស់នេះ បានបែងចែកតាមដំណាក់កាល គឺដំណាក់កាលនៅពេលឃោសនាប្រើប្រាស់កម្លាំងជាង២ម៉ឺននាក់ គឺការពារតាមគោលដៅគណៈកម្មការឃុំសង្កាត់រៀបចំការបោះឆ្នោត និងត្រៀមកម្លាំងសម្រាប់ជួយសម្រួលដល់ការរៀបចំក្បួនហែរឃោសនា និងតម្រាយផ្លូវនានាដែលមានសំណូមពរពីគណបក្សនយោបាយនីមួយៗ។ ដោយឡែកសម្រាប់ថ្ងៃបោះឆ្នោត និងរាប់សន្លឹកឆ្នោត គឺប្រើប្រាស់កម្លាំងជាង៧ម៉ឺន៥ពាន់នាក់ ដោយក្នុងនោះកម្លាំងការពារការិយាល័យផ្ទាល់ គឺកម្លាំងនគរបាល និងមានកម្លាំងជំនួយពីប្រជាការពារ ហើយកម្លាំងកងរាជអាវុធហត្ថ និងកម្លាំងកងយោធពលខេមរភូមិន្ទ គឺជាកម្លាំងគាំទ្រការពារភូមិសាស្ត្រនៅខាងក្រៅ។

អ្នកនាំពាក្យអគ្គស្នងការដ្ឋាននគរបាលជាតិ បានបញ្ជាក់ថា “ក្រៅពីនោះ យើងក៏មានកម្លាំងអន្តរាគមន៍នៅតាមមូលដ្ឋានប្រមាណជាង៦ពាន់នាក់ សុទ្ធតែបានត្រៀមនៅតាមមស្នងការរាជធានី ខេត្ត តាមអធិការដ្ឋាន និងប៉ុស្តិ៍នគរបាលរដ្ឋបាល។ ជាមួយគ្នានេះ យើងក៏មានត្រៀមកម្លាំងថ្នាក់ជាតិប្រមាណជាង១២០០នាក់ទៀត ដើម្បីត្រៀមចេញប្រតិបត្តិការក្នុងករណីមានហេតុការណ៍ចៃដន្យយថាហេតុកើតឡើងក្នុងដំណាក់កាលការឃោសនាបោះឆ្នោត និងសម្រាប់ការបោះឆ្នោត និងរាប់សន្លឹកឆ្នោត”។ ឧត្តមសេនីយ៍ឯក ឆាយ គឹមខឿន បានបន្តថា ចំពោះកិច្ចការពារគណបក្សនយោបាយ គឺកងកម្លាំងការពារជូនគ្រប់គណបក្សទាំងអស់ ដោយគ្មានការរើសអើង គឺស្មើៗភាពគ្នា៕