ទាហានសុីឈ្នួល Wagner នឹងមិនអាចប្រយុទ្ធនៅសង្រ្គាមអ៊ុយក្រែន តទៅទៀតបាននោះទេ

ម៉ូស្គូ៖ សមាជិកសភាជាន់ខ្ពស់មួយរូបបានឲ្យដឹងកាលពីថ្ងៃព្រហស្បតិ៍ថា មេទាហានស៊ីឈ្នួល Wagner ដឹកនាំដោយលោក Yevgeny Prigozhin ត្រូវបានគេប្រាប់ថា ក្រុមមេទាហានស៊ីឈ្នួល របស់លោកនឹងមិនធ្វើសង្គ្រាមនៅអ៊ុយក្រែនទៀតទេ ខណៈដែលលោកបានបដិសេធមិនចុះហត្ថលេខាលើកិច្ចសន្យាដើម្បីនាំយកទាហានស៊ីឈ្នួលរបស់លោកនៅក្រោមការជំរុញរបស់ក្រសួងការពារជាតិ។

លោកវរសេនីយ៍ឯក Andrei Kartapolov សមាជិកសភាដ៏មានឥទ្ធិពលម្នាក់ ដែលធ្វើជាប្រធានគណៈកម្មាធិការការពារជាតិនៃសភាជាន់ទាប បានឲ្យដឹងថា កត្តាបង្កឱ្យមានការបះបោរកាលពីថ្ងៃសៅរ៍គឺជាការមិនយល់ស្របរបស់លោក Yevgeny Prigozhin ចំពោះការទាមទាររបស់ក្រសួងការពារជាតិរុស្សុី ដែលក្រុមទាហានស៊ីឈ្នួលរបស់លោកចុះកិច្ចសន្យា។

លោក Andrei Kartapolov បានបន្តថា ដូចដែលអ្នកបានដឹង ពីរបីថ្ងៃមុនការប៉ុនប៉ងបះបោរ ក្រសួងការពារជាតិរុស្សុីបានឲ្យដឹងថា ទម្រង់ទាំងអស់ដែលអនុវត្តភារកិច្ចប្រយុទ្ធត្រូវតែចុះហត្ថលេខាលើកិច្ចសន្យាជាមួយក្រសួងការពារជាតិ។

លោក Yevgeny Prigozhin បានឲ្យដឹងនៅថ្ងៃទី១១ ខែមិថុនាថា ក្រុមទាហានសុីឈ្នួល Wagner របស់លោកនឹងមិនចុះកិច្ចសន្យាណាមួយជាមួយរដ្ឋមន្ត្រីការពារជាតិរុស្សុី លោក Sergei Shoigu ដោយបន្ថែមថា លោក Sergei Shoigu មិនអាចគ្រប់គ្រងអង្គភាពយោធាបានទេ។

លោក Andrei Kartapolov បានឲ្យដឹងថាបន្ទាប់ពីការបដិសេធរបស់លោក Yevgeny Prigozhin ក្នុងការចុះហត្ថលេខាលើកិច្ចសន្យាគាត់ត្រូវបានគេប្រាប់ថាទាហានស៊ីឈ្នួលរបស់គាត់នឹងលែងប្រយុទ្ធនៅអ៊ុយក្រែនហើយដូច្នេះនឹងមិនទទួលបានប្រាក់រដ្ឋទេ។

ប្រភព៖ Reuters

ប្រែសម្រួលដោយ៖ [ឡាយ លីហួ]