នាយឧត្តមសេនីយ៍ នាង ផាត ចាត់ទុកថាយន្តហោះគ្មានមនុស្សបើក ដែលហោះចូលមកលើព្រំដែនកម្ពុជា ក្នុងខេត្តរតនគិរី គឺជាការរំលោភបំពានយ៉ាងគឃ្លើនមកលើអធិបតេយ្យភាពរបស់កម្ពុជា

ភ្នំពេញ៖ ឯកឧត្តម នាយឧត្តមសេនីយ៍ នាង ផាត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងការពារជាតិ នៅថ្ងៃទី២៩ ខែមិថុនា ឆ្នាំ២០២៣ បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារក្នុងឆមាសទី១ និងលើកទិសដៅបន្តសម្រាប់ឆមាសទី២ ឆ្នាំ២០២៣។ កិច្ចប្រជុំនេះបានធ្វើឡើងនៅទីស្តីការក្រសួងការជាតិ ដោយមានការចូលរួមពីថ្នាក់ដឹកនាំក្រសួងការពារជាតិ ថ្នាក់ដឹកនាំអគ្គបញ្ជាការដ្ឋាន និងអង្គភាពក្រោមចំណុះផងដែរ។

ចំពោះបញ្ហាទាក់ទងជាមួយនឹង យន្តហោះគ្មានមនុស្សបើក (Drone) ដែលហោះចូលមកលើព្រំដែនប្រទេសកម្ពុជា ក្នុងខេត្តរតនគិរី ឯកឧត្តម នាយឧត្តមសេនីយ៍ នាង ផាត បានចាត់ទុកថា គឺជាការរំលោភបំពានយ៉ាងគឃ្លើនមកលើអធិបតេយ្យភាពរបស់កម្ពុជា ដែលសកម្មភាពនេះ កងយុទ្ធពលខេមរភូមិន្ទត្រូវតែឆ្លើយតបយ៉ាងម៉ឺងម៉ាត់ ដោយមិនអត់ឱនឱ្យបានជាដាច់ខាត។

ដោយឡែកចំពោះទិសដៅការងារសម្រាប់ឆមាសទី២ ឆ្នាំ២០២៣ ឯកឧត្តម នាយឧត្តមសេនីយ៍ បានចង្អុលបង្ហាញបន្ថែមអំពីផែនការការងារសំខាន់មួយចំនួនទៀតក្នុងនោះមានដូចជា៖ ការត្រៀមគ្រប់លក្ខណៈសម្បត្តិចូលរួមការពារសន្តិសុខ សុវត្ថិភាព របៀបរៀបរយនិងសណ្តាប់ធ្នាប់ជុំវិញការបោះឆ្នោតជ្រើសតាំងតំណាងរាស្ត្រ នីតិកាលទី៧ ការបន្តធ្វើកំណែទម្រង់ និងពង្រឹងសមត្ថភាពកងទ័ព ការរៀបចំធ្វើសមយុទ្ធ «ទេវតាសន្តិភាព» រវាងកងយោធពលខេមរភូមិន្ទជាមួយកងទ័ពរំដោះប្រជាជនចិន ការបន្តចុះផ្សព្វផ្សាយសៀវភៅសការពារជាតិឆ្នាំ២០២២ សម្រាប់ឆមាសទី២ ឆ្នាំ២០២៣ ការរៀបចំ និងកែសម្រួលច្បាប់មួយចំនួនដូចជាច្បាប់ស្តីពីការរៀបចំតុលាការយោធា ច្បាប់ស្តីពីការគ្រប់គ្រងអាកាសយានគ្មានមនុស្សបើក (DRONE)។ ការបន្តចុះស្រាវជ្រាវ និងសិក្សាតំបន់ប្រវត្តិសាស្ត្រយោធាតាមបណ្ដាយោធភូមិភាគ និងតាមដានការសាងសង់ស្តូបអនុស្សាវរីយ៍នយោបាយឈ្នះ ឈ្នះ នៅខេត្តកោះកុង ប៉ៃលិន និងនៅស្រុកអន្លង់វង ខេត្តឧត្តរមានជ័យ និងការរៀបចំទីស្នាក់ការប្រវត្តិសាស្ត្រយោធាមួយចំនួនដែលពុំទាន់សាងសង់ផងដែរ ៕