លោកជំទាវ ពុំ ចន្ទីនី ដឹកនាំជំនួបជាមួយសាខាកាកបាទក្រហមកម្ពុជា ខេត្តព្រះសីហនុ និងប្រតិភូយុវជន ទាំង ៤ រូប ដែលនឹងត្រូវទៅចូលរួមកម្មវិធីបោះជំរំយុវជនអន្តរជាតិលើកទី៩ ឆ្នាំ២០២៣ នៅប្រទេសឥណ្ឌូនេស៊ី

ភ្នំពេញ៖ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា នាព្រឹកថ្ងៃទី៣០ ខែមិថុនា ឆ្នាំ២០២៣ បានដឹកនាំជំនួបជាមួយសាខាកាកបាទក្រហមកម្ពុជា ខេត្តព្រះសីហនុ និងប្រតិភូយុវជន ទាំង ៤ រូប ដែលនឹងត្រូវទៅចូលរួមកម្មវិធីបោះជំរំយុវជនអន្តរជាតិលើកទី៩ ឆ្នាំ២០២៣ នៅប្រទេសឥណ្ឌូនេស៊ី ចាប់ពីនៅថ្ងៃទី២ ដល់ថ្ងៃទី១០ ខែកក្កដា ឆ្នាំ២០២៣ ខាងមុខ នៅខេត្ត South Lampung។

ក្នុងឱកាសនេះ លោកជំទាវអគ្គលេខាធិការ បានមានប្រសាសន៍ផ្ដាំផ្ញើ មួយចំនួនដូចតទៅ៖
១-កាកបាទក្រហមកម្ពុជា ដែលមាន សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន គឺលោកតែងតែយកចិត្តទុកដាក់ជាមួយយុវជន អ្នកស្ម័គ្រចិត្តកាកបាទក្រហមកម្ពុជា ហើយលោកបានអនុញ្ញាតដល់ទីប្រឹក្សាយុវជន អ្នកស្ម័គ្រចិត្ត និងយុវជន ៤នាក់ ឱ្យចូលរួមក្នុងកម្មវិធីបោះជំរំនេះ។
២-ប្រតិភូដែលចូលរួម សូមនាំយកនូវចំណេះដឹង បទពិសោធន៍ សកម្មភាព និងស្នាដៃ ដែលជាមោទនភាពរបស់ កាកបាទក្រហមកម្ពុជា ទៅចែករំលែកដល់សមាជិកជំរំ បានយល់ដឹង និងស្គាល់កាន់តែច្បាស់ពី កាកបាទក្រហមកម្ពុជា
៣-ប្រតិភូត្រូវចូលរួមដោយសកម្មជាមួយកម្មវិធី ហ៊ានសួរ ឆ្លើយ និងបញ្ចេញយោបល់ ទៅតាមកម្មវិធីនីមួយៗរបស់ជំរំ ដើម្បីបង្ហាញដល់សមាគមជាតិផ្សេងទៀតបានដឹងពីសមត្ថភាពរបស់អ្នកស្ម័គ្រចិត្ត កាកបាទក្រហមកម្ពុជា
៤-សិក្សារៀនសូត្រ និងព្យាយាមទទួលយកនូវចំណេះដឹង បទពិសោធន៍ ពីសមាគមជាតិផ្សេងៗ ដើម្បីយកមកចែករំលែក និងអភិវឌ្ឍន៍សមត្ថភាពដល់យុវជន និងអ្នកស្ម័គ្រចិត្ត កាកបាទក្រហមកម្ពុជា នាពេលបន្ទាប់ ទាំងនៅសហមគមន៍ និងគ្រឹះស្ថានសិក្សា។

ជាទីបញ្ចប់ លោកជំទាវអគ្គលេខាធិការ បានជូនពរ ដល់ប្រតិភូទាំងអស់ សូមធ្វើដំណើរប្រកបដោយសុវត្ថិភាព និងជោគជ័យក្នុងបេសកកម្មបោះជំរំយុវជនអន្តរជាតិ លើកទី៩ នេះ។
គួរំលឹកជូនថា កម្មវិធីបោះជំរំយុវជនអន្តរជាតិលើកទី៩ ឆ្នាំ២០២៣ គឺមានគោលបំណងដើម្បីផ្ដល់ឱកាសឱ្យយុវជន អ្នកស្ម័គ្រចិត្ត ចេះធ្វើការងារជាក្រុម ចែករំលែកបទពិសោធន៍ការងារផ្ទាល់ខ្លួន ផ្លាស់ប្ដូរចំណេះដឹង និងផ្នត់គំនិតជាវិជ្ជមាន ពីការងារអភិវឌ្ឍសហគមន៍រួមគ្នា ៕