ឯកឧត្តម ខូយ រីដា៖ ក្នុងនាមជាសមាជិកបក្ស នៃនគរទេវតា យើងបាននឹងកំពុងត្រៀមខ្លួន ដើម្បីយកជ័យជម្នះក្នុងការប្រកួតប្រជែងតាមបែបប្រជាធិបតេយ្យ

ភ្នំពេញ៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ និងជាប្រធានគណៈកម្មាធិការ គណបក្សប្រជាជនកម្ពុជាខេត្ត បានលើកឡើងថា ក្នុងនាមជាសមាជិកបក្ស នៃនគរទេវតា យើងបាននឹងកំពុងត្រៀមខ្លួន ដើម្បីយកជ័យជម្នះក្នុងការប្រកួតប្រជែងតាមបែបប្រជាធិបតេយ្យ សម្រាប់ការបោះឆ្នោតជ្រើសតាំងតំណាងរាស្ត្រខាងមុខ ដូច្នេះសូមឲ្យបងប្អូនប្រជាពលរដ្ឋ ក្នុងឃុំស្រែស្តុក ស្រុកកណ្តៀង ក៏ដូចជាប្រជាពលរដ្ឋទូទាំងខេត្ត បន្តគាំទ្រគោលនយោបាយរបស់រាជរដ្ឋាភិបាល តាមរយៈនៃការបោះឆ្នោតគាំទ្រ និងទទួលបានមកវិញនូវសុខសន្តិភាព ស្ថិរភាព និងការអភិវឌ្ឍរីកចម្រើនបន្ថែមទៀត។

ឯកឧត្តម ខូយ រីដា បានលើកឡើងបែបនេះ នៅបរិវេណវត្តក្តីឧត្តម ហៅវត្តក្តីឃ្វិត ក្នុងឱកាសអញ្ជើញជួបសំណេះសំណាល និងសួរសុខទុក្ខ ពុកម៉ែបងប្អូនប្រជាពលរដ្ឋ ដែលជាជនចាស់ជរា គ្រួសារក្រីក្រ ក្មេងកំព្រា គ្រូបង្រៀន សិស្សថ្នាក់ទី១២ និងនិវត្តន៍ជន ជិត៥០០នាក់ នារសៀលថ្ងៃទី៣០ ខែមិថុនា ឆ្នាំ២០២៣។ ដោយបានការចូលរួមពី ឯកឧត្តម អេង គន្ធា អគ្គនាយករងអគ្គិសនីកម្ពុជា និងជាប្រធានក្រុមការងារចុះជួយឃុំអន្សាចំបក់ ស្រុកក្រគរ និងឃុំស្រែស្តុក ស្រុកកណ្តៀង, កញ្ញា ចំរើន សុភក្ត្រ តារាចម្រៀងប្រចាំផលិតកម្មហង្សមាស ក្រុមការងារចុះជួយឃុំ អាជ្ញាធរមូលដ្ឋាន សិល្បៈករ សិល្បៈការិនី និងពិធីករ ពិធីការិនីមួយចំនួនទៀត ៕