ឯកឧត្តម អ៊ុំ រាត្រី បំពាក់គ្រឿងឥស្សរិយយស ជូនអតីតយុទ្ធជនខេត្តបន្ទាយមានជ័យ ២៤៧នាក់

ភ្នំពេញ៖ ឯកឧត្តម អ៊ុំ រាត្រី អភិបាលខេត្ត និងជាប្រធានកិត្តិយស សមាគមអតីតយុទ្ធជនកម្ពុជាខេត្តបន្ទាយមានជ័យ នៅថ្ងៃទី៣០ ខែមិថុនា ឆ្នាំ២០២៣ បានអញ្ជើញជាអធិបតីដ៏ខ្ពង់ខ្ពស់ ក្នុងពិធីបំពាក់គ្រឿងឥស្សរិយយសជូន អតីតយុទ្ធជនកម្ពុជានៅ មជ្ឍមណ្ឌលតេជោសន្ដិភាព ចំនួន ២៤៧នាក់។

ក្នុងរបាយការណ៍ស្វាគមន៍របស់ ឧត្តមសេនីយ៍ត្រី ជឹម ប៊ុនអាន មេបញ្ជាការតំបន់ប្រតិបត្តិការសឹករងបន្ទាយមានជ័យ ប្រធានសមាគមអតីតយុទ្ធជនកម្ពុជាខេត្ត បានបញ្ជាក់ថា គ្រឿងឥស្សរិយយសដែលសមាគមអតីតយុទ្ធជនកម្ពុជាខេត្ត បានទទួលមានចំនួន ២៤៧គ្រឿង ក្នុងនោះមាន គ្រឿងឥស្សរិយយសការពារជាតិថ្នាក់មាស ចំនួន ៣៩គ្រឿង និងប្រាក់ ចំនួន ២០៨គ្រឿង ដោយធ្វើពិធីបំពាក់ជូនបងប្អូនអតីតយុទ្ធជនពេលនេះ ចំនួន ២៤៧នាក់ គឹដើម្បីបង្រ្គប់លើចំនួនសរុប ៥.៤៩៥ នាក់ ដែលត្រូវបិទបញ្ចប់ ។

នៅក្នុងឱកាសបំពាក់គ្រឿងឥស្សរិយយសជូនបងប្អូនអតីតយុទ្ធជន នាពេលនេះ ឯកឧត្តម ប្រធានកិត្តិយស សមាគមអតីតយុទ្ធជនកម្ពុជាខេត្តបន្ទាយមានជ័យ បាននាំយកថវិកាដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា ឧបត្ថម្ភដល់អតីតយុទ្ធជនទាំង ២៤៧នាក់ ក្នុងម្នាក់ៗ ទទួលបានថវិកា ចំនួន ៥០.០០០រៀល ផងដែរ៕