អតីតអភិបាលរាជធានីភ្នំពេញ សរសើរសាលារាជធានីភ្នំពេញ ដែលខិតខំធ្វើឲ្យទឹកស្រកយ៉ាងលឿន

ភ្នំពេញ៖ តំណាងរាស្ត្រមណ្ឌលភ្នំពេញ និងជាអតីតអភិបាលរាជធានីភ្នំពេញ ឯកឧត្ដម កែប ជុតិមា បានកោតសរសើរដល់សាលារាជធានីភ្នំពេញ និងមន្ត្រីពាក់ព័ន្ធទាំងអស់ដែលបានខិតខំប្រឹងប្រែងធ្វើឲ្យទឹកស្រកយ៉ាងលឿន។

កាលពីល្ងាចថ្ងៃទី ៣ ខែកក្កដា ឆ្នាំ ២០២៣ នៅរាជធានីភ្នំពេញ មានភ្លៀងធ្លាក់យ៉ាងខ្លាំង ដែលមានកំពស់រហូតដល់ ១៥៣មម ដែលជាកំពស់ទឹកភ្លៀងធ្លាក់ខ្លាំងមិនធ្លាប់មាន ក្នុងរយៈពេល ៣ឆ្នាំចុងក្រោយនេះ។

តាមរយៈទំព័រហ្វេសប៊ុក នាព្រឹកថ្ងៃទី ៤ ខែកក្កដានេះឯកឧត្ដម កែប ជុតិមា បានឲ្យដឹងថា “សូមកោតសរសើរដល់សាលារាជធានីភ្នំពេញ បុគ្គលិក កម្មករ នៃមន្ទីរសាធារណការ និងដឹកជញ្ជូនរាជធានីភ្នំពេញ សហការជាមួយអាជ្ញាធរខណ្ឌទាំង ១៤ ដែលបានខិតខំប្រឹងប្រែងធ្វើឲ្យទឹកស្រកយ៉ាងលឿន ជាមួយនឹងប្រសិទ្ធភាពនៃកំណើន ៣ដង នៃការបូមទឹកថ្មីនៃស្ថានីយ៍បូមទឹកទាំង ១៤កន្លែង អាចទប់នឹងភ្លៀងបោកបក់ខ្លាំងនៅរាជធានីភ្នំពេញ ដែលមានរយៈកម្ពស់ ១៥៣មម ជាកម្ពស់ទឹកភ្លៀងធ្លាក់ខ្លាំងមិនធ្លាប់មានក្នងរយៈពេល ៣ឆ្នាំចុងក្រោយនេះ បានយ៉ាងលឿន”។

មន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា ទឹកភ្លៀងធ្លាក់ខ្លាំងកាលពីល្ងាចថ្ងៃចន្ទ មានកំពស់រហូតដល់ ១៥៣មម (វាស់នៅស្ថានីយ៍បឹងត្របែក) ដែលជាកំពស់ទឹកភ្លៀងធ្លាក់ខ្លាំងមិនធ្លាប់មានក្នុងរយៈពេល ៣ឆ្នាំចុងក្រោយនេះ ដែលបានបណ្តាលឲ្យទឹកលិចលង់នៅតំបន់មួយចំនួន នៅខណ្ឌចំនួន ៥នៅតំបន់កណ្តាលក្រុង ខណ្ឌសែនសុខ មានជ័យ ច្បារអំពៅ ពោធិ៍សែនជ័យ។

ជាមួយគ្នានោះមន្ទីរសាធារណការ និងដឹកជញ្ជូនរាជធានីភ្នំពេញ បានស្នើសុំការយោគយល់អធ្យាស្រ័យ និងចូលរួមក្នុងការកាយសំរាមស្ទះទឹកនៅមុខចម្រឹងអណ្តូងលូ ស្ថិតនៅមុខលំនៅដ្ឋានរៀងៗខ្លួន៕