ឯកឧត្ដម ហង់ជួន ណារ៉ុន ដឹកនាំយុទ្ធនាការឃោសនាបោះឆ្នោត នៅឃុំគោលដៅចំនួន០៣ ក្នុងស្រុកកងមាស ប្រមាណជាង ២ពាន់នាក់
ភ្នំពេញ៖ ឯកឧត្ដមបណ្ឌិតសភាចារ្យ ហង់ជួន ណារ៉ុន ប្រធានក្រុមការងារជួយស្រុកកងមាស ខេត្តកំពង់ចាម នៅព្រឹកថ្ងៃទី០៨ ខែកក្កដា ឆ្នាំ២០២៣ ជាថ្ងៃទី៨ នៃយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាល ទី៧ ឆ្នាំ២០២៣ បានអញ្ជើញដឹកនាំក្បួនយុទ្ធនាការឃោសនាបោះឆ្នោត នៅឃុំគោលដៅចំនួន០៣ រួមមាន៖ ឃុំព្រែកក្របៅ ឃុំពាមជីកង និងឃុំរកាគយ ស្រុកកងមាសដែលមានការចូលរួមពីសមាជិក សមាជិកា សកម្មជនគណបក្សប្រជាជនកម្ពុជា ថ្នាក់កណ្តាល និងមូលដ្ឋានជាង ២,០០០នាក់។
ឯកឧត្ដមបណ្ឌិតសភាចារ្យ បានថ្លែងអំណរគុណ និងកោតសរសើរថ្នាក់ដឹកនាំ និងសមាជិក សមាជិកាគណបក្ស ព្រមទាំងប្រជាពលរដ្ឋស្រុកកងមាស ដែលមានភក្ដីភាពជឿជាក់គាំទ្រឥតងាករេមកលើគណបក្សប្រជាជនកម្ពុជា នាពេលកន្លងមក និងបានអញ្ជើញចូលរួមក្នុងយុទ្ធនាការឃោសនាបោះឆ្នោតយ៉ាងមហោឡារិក។
ក្រោមការដឹកនាំដោយ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានធ្វើឱ្យប្រទេសជាតិបន្តរក្សាបានសុខសន្តិភាព បូរណភាពទឹកដី អធិបតេយ្យភាពជាតិ ស្ថេរភាពនយោបាយ ការពាររបបរាជានិយម ធានាបានលំនឹងសេដ្ឋកិច្ច។
ឯកឧត្ដមបណ្ឌិតសភាចារ្យ បានអំពាវនាវសមាជិក សមាជិកា អ្នកគាំទ្រគណបក្សប្រជាជនកម្ពុជា ត្រៀមលក្ខណៈអញ្ជើញទៅបោះឆ្នោត នាថ្ងៃទី២៣ ខែកក្កដា ឆ្នាំ២០២៣ខាងមុខនេះនិងសូមបោះឆ្នោតគាំទ្រគណបក្សប្រជាជនកម្ពុជាដេីម្បីបន្តរស់នៅក្នុងសុខសន្តិភាព ៕
