សម្ដេច ស ខេង អំពាវនាវដល់សមាជិក-សមាជិកា និងប្រជាពលរដ្ឋទាំងអស់ បោះឆ្នោតជូនគណបក្សប្រជាជនកម្ពុជា ដើម្បីបន្តការដឹកនាំមាតុភូមិកម្ពុជា ឆ្ពោះទៅរកភាពរីកចម្រើន

ភ្នំពេញ៖ សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តបាត់ដំបង និងព្រៃវែង បានអំពាវនាវដល់សមាជិក-សមាជិកា និងប្រជាពលរដ្ឋទាំងអស់ ដែលមានឈ្មោះក្នុងបញ្ជីឈ្មោះបោះឆ្នោត ត្រូវត្រៀមលក្ខណៈអញ្ជើញទៅបោះឆ្នោត នាថ្ងៃទី២៣ ខែកក្កដា ឆ្នាំ២០២៣ ខាងមុខនេះ ឱ្យបានគ្រប់ៗគ្នា ហើយបោះឆ្នោតជូនគណបក្សប្រជាជនកម្ពុជា ដែលមានលេខរៀងទី១៨ ដើម្បីបន្តការដឹកនាំមាតុភូមិកម្ពុជា ឆ្ពោះទៅរកភាពរីកចម្រើន។

ការអំពាវនាវរបស់សម្ដេចក្រឡាហោមបែបនេះបានធ្វើឡើង កាលពីរសៀលថ្ងៃទី១៦ ខែកក្កដា ឆ្នាំ២០២៣ ក្នុងពេលជួបសំណេះសំណាលជាមួយ ថ្នាក់ដឹកនាំ សមាជិក-សមាជិកា គណបក្សប្រជាជនកម្ពុជាឃុំប្រាសាទ និងឃុំកន្សោមអក នៃស្រុកកំពង់ត្របែក ខេត្តព្រៃវែង។

ក្នុងនាម សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា សម្ដេចក្រឡាហោម ស ខេង បានថ្លែងអំណរគុណ និងកោតសរសើរចំពោះក្រុមការងារគណបក្សស្រុកកំពង់ត្របែក និងសមាជិក-សមាជិកាទាំងអស់ ដែលបានខិតខំប្រឹងប្រែងបំពេញតួនាទីភារកិច្ចរបស់ខ្លួន ប្រកបដោយស្មារតីទទួលខុសត្រូវខ្ពស់ ជាពិសេស គឺការជួយដោះស្រាយបញ្ហានានារបស់ប្រជាពលរដ្ឋ ក្នុងស្រុកកំពង់ត្របែក ក្នុងរយៈពេល ៥ឆ្នាំកន្លងមកនេះ ពោលចាប់ពីឆ្នាំ២០១៨ ដល់ ២០២៣។

ទន្ទឹមនឹងនោះ សម្ដេចក្រឡាហោម ស ខេង បានអំពាវនាវដល់សមាជិក-សមាជិកា និងប្រជាពលរដ្ឋទាំងអស់ ដែលមានឈ្មោះក្នុងបញ្ជីឈ្មោះបោះឆ្នោត ត្រូវត្រៀមលក្ខណៈអញ្ជើញទៅបោះឆ្នោត នាថ្ងៃទី២៣ ខែកក្កដា ឆ្នាំ២០២៣ ខាងមុខនេះ ឱ្យបានគ្រប់ៗគ្នា ហើយបោះឆ្នោតជូនគណបក្សប្រជាជនកម្ពុជា ដែលមានលេខរៀងទី១៨ ដើម្បីបន្តការដឹកនាំមាតុភូមិកម្ពុជា ឆ្ពោះទៅរកភាពរីកចម្រើន រុងរឿង និងស៊ីវិល័យ បន្ថែមទៀតផងដែរ។

លើសពីនេះ សម្ដេចក្រឡាហោម ក៏បានថ្លែងអំណរគុណចំពោះការគាំទ្រ និងការចូលរួមរបស់ថ្នាក់ដឹកនាំ និងសមាជិក-សមាជិកាទាំងអស់ នៅក្នុងយុទ្ធនាការឃោសនាបោះឆ្នោត ដោយបានចាប់ផ្ដើមពីថ្ងៃទី១ ដល់ ១៦ ខែកក្កដា ឆ្នាំ២០២៣ បានធ្វើឱ្យសកម្មភាពនៃការឃោនាបោះឆ្នោតនេះ មានភាពសកម្ម និងផុសផុល ប្រកបដោយមនោសញ្ចេតនា និងជំនឿយ៉ាងមុតមាំ មកលើគណបក្សប្រជាជនកម្ពុជា៕