មន្ត្រីជាន់ខ្ពស់ក្រសួងធនធានទឹក ចុះពិនិត្យលើការងារពង្រឹង និងពង្រីកតួរទំនប់អាងត្រពាំងថ្ម ស្ថិតក្នុងស្រុកភ្នំស្រុក ខេត្តបន្ទាយមានជ័យ

ភ្នំពេញ៖ នៅថ្ងៃទី១ ខែសីហា ឆ្នាំ២០២៣នេះ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម ដែលជាប្រធានមុខព្រួញទទួលទិសខេត្តបន្ទាយមានជ័យ អមដំណើរដោយសហការី មន្ទីរធនធានទឹក និងឧតុនិយម និងអាជ្ញាធរដែនដីគ្រប់លំដាប់ថ្នាក់ បានចុះធ្វើការពិនិត្យលើការងារពង្រឹង និងពង្រីកតួរទំនប់អាងត្រពាំងថ្ម ស្ថិតក្នុងស្រុកភ្នំស្រុក ខេត្តបន្ទាយមានជ័យ លើការងារខ្ចប់វេចទឹកទុកក្នុងបរិមាណប្រមាណ ៣០០ លានម៉ែត្រគូប និងធ្វើជាផ្លូវប្រវត្តិសាស្រ្ត ដោយចាក់បេតុងអាម៉េតភ្ជាប់ពីខេត្តបន្ទាយមានជ័យ ទៅតំបន់នានានៃព្រំដែនដ៏មានសារៈសំខាន់ប្រកបដោយសក្តានុពលខ្ពស់ក្នុងតំបន់ប៉ូលសេដ្ឋកិច្ចទី ៤ ភូមិភាគពាយព្យ នៃព្រះរាជាណាចក្រកម្ពុជា ។

សូមជម្រាបជូនថា ក្រោយពីទទួលបាននូវបទបញ្ជាដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្តម លឹម គានហោ រដ្ឋមន្ដ្រីក្រសួងធនធានទឹក និងឧតុនិយម និងដោយទទួលបាននូវការគាំទ្រសហការយ៉ាងពេញទំហឹងពីសំណាក់ក្រសួងសេដ្ឋកិច្ច និងហិរញ្ញវត្ថុ MEF បានធ្វើការដឹកនាំ និងបញ្ជាផ្ទាល់លើការងារសាងសង់ផ្លូវប្រវត្តិសាស្រ្តលើទំនប់អាងត្រពាំថ្ម ដើម្បីតភ្ជាប់ទៅបណ្តាខេត្តដែលនៅជាប់នឹងតំបន់ព្រំដែន ជាពិសេស និងបន្ទាន់ឲ្យបានទាន់ពេលវេលាសម្រាប់បងប្អូនប្រជាពលរដ្ឋ ។

ឯកឧត្តមរដ្ឋមន្ដ្រី បានយកចិត្តទុកដាក់ ក្នុងយុទ្ធសាស្រ្តធ្វើការពង្រឹង និងពង្រីកសក្តានុពលរបស់អាងត្រពាំងថ្មខ្នាតធំរបស់ប្រទេសមួយនេះជាប្រចាំ ចាប់តាំងពីតំបន់ប្រព័ន្ធធារាសាស្រ្តនេះស្ថិតក្នុងការប្រទាញប្រទុង និងសង្រ្គាមជាមួយនឹងពួកឧទ្ទាមខ្មែរក្រហម ដោយគ្រប់សំណង់ហេដ្ឋារចនាសម្ព័ន្ធទាំងមូល ត្រូវរងការខូចខាតដោយទឹកជំនន់គ្រប់ប្រភេទ ។

រហូតមកដល់ឆ្នាំ ២០១៣ ដោយមានគាំទ្រពីសំណាក់ក្រសួងសេដ្ឋកិច្ច និងហិរញ្ញវត្ថុ MEF និងធនាគារអភិវឌ្ឍន៍អាស៊ី ADB ប្រព័ន្ធធារាសាស្រ្តនេះ បានធ្វើការជួសជុលស្តារឡើងវិញទាំងស្រុង ដើម្បីឲ្យមានលក្ខណៈគ្រប់ជ្រុងជ្រោយ និងមានលទ្ធភាពធ្វើការស្រោចស្រពលើផ្ទៃដីបានចំនួន ៣៥.០០០ ហិកតា និងអាចបង្កបង្កើនផលបាន ៣ ដង ក្នុងមួយឆ្នាំ ដោយមានការគ្រប់គ្រងបានត្រឹមត្រូវក្នុងការដោះទឹក ការស្រោចស្រព និងការវេចខ្ចប់ទឹកទុក រហូតដល់តំបន់ ៣ នៃបឹងទន្លេសាបដោយធ្វើសមាហរណកម្មជាមួយនឹងប្រព័ន្ធធារាសាស្រ្តស្រែង ប្រព័ន្ធប្រឡាយកុមារ ប្រព័ន្ធធារាសាស្រ្តអន្សងនាវណាំតាវ ប្រព័ន្ធធារាសាស្រ្តស្រែល្អ ប្រព័ន្ធធារាសាស្រ្តតាម៉េង និងប្រព័ន្ធធារាសាស្រ្តពន្លៃ៕