អភិបាលខេត្តកំពង់ធំ អញ្ជើញប្រគេនទៀនវស្សា គ្រឿងឧបភោគបរិភោគ និងបច្ច័យមួយចំនួនជូនដល់វត្តចំនួន១០វត្ត ក្នុងក្រុងស្ទឹងសែន
ភ្នំពេញ៖ ឯកឧត្តម ងួន រតនៈ អភិបាលខេត្តកំពង់ធំ និងលោកជំទាវ ព្រមទាំងសហការី ប្រធាន អនុប្រធានមន្ទីរជុំវិញខេត្ត មន្រ្តីរាជការ នាព្រឹកថ្ងៃទី០២ ខែសីហា ឆ្នាំ២០២៣ បានអញ្ជើញប្រគេន ទៀនវស្សាគ្រឿងឧបភោគបរិភោគ និងបច្ច័យមួយចំនួនជូនដល់វត្តចំនួន១០វត្ត ក្នុងក្រុងស្ទឹងសែន ដែលមានទីតាំងនៅវត្តឥន្រ្ទីយសវរៈ (ហៅវត្តកំពង់ធំ) ក្នុងឱកាសពិធីបុណ្យចូលព្រះវស្សានេះ។
ពិធីបុណ្យចូលព្រះវស្សា គឺជាបុណ្យមួយដែលបងប្អូនប្រជាពលរដ្ឋទូទាំងប្រទេសកម្ពុជា ប្រារព្វឡើងក្នុងគោលបំណងបង្ហាញពីការបំភ្លឺនៅបញ្ញាដល់ព្រះសង្ឃ ពិសេសគឺការរៀនសូត្ររបស់ព្រះសង្ឃនៅក្នុងវត្តអស់រយៈពេលបីខែពុំនិមន្តទៅណាបានឡើយ។ នៅពេលខាងមុខនេះព្រះសង្ឃនៅគ្រប់ទីវត្តអារាមទូទាំងប្រទេសគោរពប្រពៃណីសាសនាព្រះពុទ្ធ ត្រូវចូលកាន់ព្រះវស្សា ក្នុងរយៈពេលអស់មួយត្រីមាសដែលព្រះសង្ឃគង់ចាំព្រះវស្សា។
សូមបញ្ជាក់ផងថា ក្នុងឱកាសនេះឯកឧត្តមអភិបាលខេត្ត ក៏បាននាំយកនូវ ទៀនវស្សា គ្រឿងឧបភោគនិងបច្ច័យមួយចំនួនប្រគេនដល់ព្រះសង្ឃគង់ចាំព្រះវស្សាទាំង១០វត្ត ក្នុង១វត្ត ទទួលបាន៖ អង្ករ ២០០គីឡូក្រាម, មី ០៥កេស, ទឹកស៊ីអ៊ីវ ០៤យួរ, ទឹកត្រី០៤យួរ, ទឹកបរិសុទ្ធ ០៤កេស, ទឹកក្រូច ០៤កេស, ទៀនវស្សា ០១គូរ និងថវិកាមួយចំនួនផងដែរ ៕
