ឯកឧត្តម កែវ រតនៈ រួមជាមួយឯកឧត្តម ខូយ រីដា ជួបសំណេះសំណាល ស្វែងយល់ពីការអភិវឌ្ឍ នៅឃុំស្រែស្ដុក ស្រុកកណ្ដៀង និងឃុំស្នាអន្សា ស្រុកក្រគរ

ភ្នំពេញ៖ ឯកឧត្តម កែវ រតនៈ អនុប្រធានក្រុមការងារគណបក្សប្រជាជនកម្ពុជា ចុះជួយមូលដ្ឋានខេត្តពោធិ៍សាត់ និងជាប្រធានក្រុមការងារចុះជួយមូលដ្ឋានស្រុកក្រគរ និងស្រុកកណ្ដៀង រួមជាមួយឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ និងជាប្រធានគណៈកម្មាធិការគណបក្សខេត្ត នាព្រឹកថ្ងៃព្រហស្បតិ៍ ២រោច ខែទុតិយាសាឍ ឆ្នាំថោះ បញ្ចស័ក ពុទ្ធសករាជ២៥៦៧ ត្រូវនឹងថ្ងៃទី០៣ ខែសីហា ឆ្នាំ២០២៣ បានអញ្ជើញជួបសំណេះសំណាល ស្វែងយល់ពីការអភិវឌ្ឍ នៅឃុំស្រែស្ដុកស្រុកកណ្ដៀង និងឃុំស្នាអន្សា ស្រុកក្រគរ ខេត្តពោធិ៍សាត់។

ពិធីនេះក៏មានការអញ្ជើញចូលរួមពី ឯកឧត្តម លោក លោកស្រីក្រុមការងារ គណបក្សប្រជាជនកម្ពុជា ចុះមូលដ្ឋានខេត្តពោធិ៍សាត់ ឯកឧត្តម សមាជិកគណៈអចិន្ត្រៃយ៍គណៈកម្មាធិការគណបក្សខេត្ត លោកប្រធាន អនុប្រធាន ព្រមទាំងសមាជិកអចិន្ត្រៃយ៍គណៈកម្មាធិការគណបក្សស្រុក លោកប្រធានគណបក្សឃុំស្រែស្តុក និងឃុំស្នាអន្សា។

ក្នុងឱកាសជួបសំណេះសំណាលនោះ ក្រុមការងារបានចែកជូនវត្ថុកំដរដៃ ដល់ប្រជាពលរដ្ឋឃុំស្រែស្តុក ជិត៥ពាន់នាក់ និងឃុំស្នាអន្សា ជិត២ពាន់នាក់ ក្នុងម្នាក់ៗទទួលបាន៖ អង្ករ ២០គីឡូក្រាម, មី ០១កេស និងទឹកត្រី ទឹកស៊ីអ៊ីវ ០១យួរ ផងដែរ ៕