នាយឧត្តមសេនីយ៍ ហ៊ឹម យ៉ាន ដឹកនាំកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ប្រចាំឆមាសទី១ ឆ្នាំ២០២៣

ភំ្នពេញ៖ ឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ នារសៀលថ្ងៃព្រហស្បតិ៍ ២រោច ខែទុតិយាសាឍ ឆ្នាំថោះ ព.ស២៥៦៧ ត្រូវនឹងថ្ងៃទី៣ ខែសីហា ឆ្នាំ២០២៣ បានអញ្ជើញដឹកនាំកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ប្រចាំឆមាសទី១ ឆ្នាំ២០២៣ នៅអគ្គស្នងការដ្ឋាននគរបាលជាតិ។ កិច្ចប្រជុំនេះ ក៏មានការអញ្ជើញចូលរួមពីលោកឧត្តមសេនីយ៍ វរសេនីយ៍ស្នងការរងរាជធានី-ខេត្តទាំង២៥។

ឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានមានប្រសាសន៍សង្កត់ធ្ងន់ដល់ស្នងការរាជធានី-ខេត្ត ឲ្យបន្តពង្រឹងយន្តការដឹកនាំបញ្ជា លើកកម្ពស់សមត្ថភាពជំនាញ ប្រកាន់វិន័យសីលធម៌ និងតាមដានប្រតិកម្មរបស់សាធារណៈជន, បន្តជំរុញការអប់រំផ្សព្វផ្សាយច្បាប់ និងអនុក្រឹត្យលេខ៣៩អនក្រ.បក និងជម្រុញការផ្សព្វផ្សាយតាមបណ្តាញសង្គម នូវអំពើល្អរបស់មន្ត្រី នគរបាលចរាចរផ្លូវគោក ដោយ ផ្ដោតលើមូលហេតុ មុខសញ្ញា ពេលវេលា និងទីកន្លែងដែលមានគ្រោះថ្នាក់។

ឯកឧត្តម នាយឧត្តមសេនីយ៍ អគ្គស្នងការរង ក៏បាននាំនូវការផ្តាំផ្ញើសាកសួរសុខទុក្ខ និងថ្លែងការកោតសរសើរដល់ លោកស្នងការរង ក៏ដូចជាមន្រ្តីនគរបាលចរាចរណ៍ផ្លូវគោកទាំងអស់ ដែលកន្លងមកបានខិតខំយកចិត្តទុកដាក់អនុវត្តភារកិច្ចប្រកបដោយការទទួលខុសត្រូវ សំដៅកាត់បន្ថយគ្រោះថ្នាក់ចរាចរណ៍។

យោងតាមរបាយការណ៍ដែលឡើងរាយការណ៍ដោយលោកឧត្តមសេនីយ៍ត្រី ថី វិសាល អនុប្រធាននាយកដ្ឋាននគរបាលចរាចរណ៍និងសណ្តាប់ធ្នាប់សាធារណៈបានឲ្យដឹងថា គ្រោះថ្នាក់ចរាចរណ៍ប្រចាំឆមាសទី១ ឆ្នាំ២០២៣ កើតឡើង ១៥៤៨លើក (យប់៥៤ភាគរយ) មានមនុស្សស្លាប់ចំនួន៧៥៦នាក់ របួស២.០៧២នាក់ (ធ្ងន់១.៣៣២នាក់) បើប្រៀបធៀបនៃគ្រោះថ្នាក់ឆ្នាំ២០២២ ថយចំនួន៦១លើក ស្មើ៤ភាគរយ ស្លាប់ថយ១៨៦នាក់ ស្មើ២០ភាគរយ របួសថយ១៦៣នាក់ ស្មើ៧ភាគរយ។

មូលហេតុ បណ្តាលមកពីល្បឿន ៣៩ភាគរយ មិនគោរពសិទ្ធិ២៥ភាគរយ, បត់១០ភាគរយ មិនប្រកាន់ស្ដាំ៩ភាគរយ វ៉ាជែង៧ភាគរយ កត្តាយានយន្ត៤ភាគរយ កត្តាស្រវឹង៣ភាគរយ ងងុយ១ភាគរយ, ល្មើសសញ្ញា១ភាគរយ និងកត្តាអាធាតុ១ភាគរយ។

គ្រោះថ្នាក់ច្រើនរួមមាន រាជធានីភ្នំពេញចំនួន៤៥៨លើក, ខេត្តព្រះសីហនុ ១២១០លើក, ខេត្តពោធិ៍សាត់ ១០៤លើក, គ្រោះថ្នាក់ផ្លូវល្បឿនលឿន កើតឡើងចំនួន ១៤៣ករណី (យប់៥២លើក) មានមនុស្សស្លាប់ចំនួន៣នាក់ និងរងរបួសចំនួន៤៤នាក់ (ធ្ងន់៧នាក់), គ្រោះថ្នាក់រថយន្តកម្មករចំនួន៥លើក ស្លាប់មនុស្ស១នាក់, របួសសរុប១០៨នាក់ (ធ្ងន់១៩នាក់) នៅខេត្តកំពង់ស្ពឺ ខេត្តតាកែវ ខេត្តកំពង់ឆ្នាំង ៕