ឯកឧត្តមរដ្ឋមន្ត្រី ព្រុំ សុខា នាំយកទៀនព្រះវស្សា ទេយ្យទាន និងបច្ច័យមួយចំនួន ប្រគេនដល់ព្រះសង្ឃដែលគង់ចាំព្រះវស្សា នៅទីអារាមវត្តក្តីកណ្តាល ស្ថិតក្នុងភូមិ៥ សង្កាត់កំពង់លាវ ក្រុងព្រៃវែង
ភ្នំពេញ៖ ឯកឧត្តម ព្រុំ សុខា រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារស្រុកបាភ្នំ រួមជាមួយក្រុមញាតិគ្រួសារ និងសហការី នាព្រឹកថ្ងៃសៅរ៍ ៤រោច ខែទុតិយាសាឍ ឆ្នាំថោះ បញ្ចស័ក ព.ស ២៥៦៥៧ ត្រូវនឹងថ្ងៃទី០៥ ខែសីហា ឆ្នាំ២០២៣ បានអញ្ជើញបូជាទៀន ធូប ផ្កាភ្ញី ថ្វាយព្រះពុទ្ធរូប និងប្រគេនទៀនព្រះវស្សា រួមជាមួយទេយ្យទាន បច្ច័យមួយចំនួនទៀត ដល់ព្រះសង្ឃដែលគង់ចាំព្រះវស្សា នៅទីអារាមវត្តក្តីកណ្តាល ស្ថិតក្នុងភូមិ៥ សង្កាត់កំពង់លាវ ក្រុងព្រៃវែង ខេត្តព្រៃវែង។
បន្ទាប់ពីវេរប្រគេនទៀនព្រះវស្សា និងគ្រឿងលំដាប់ព្រះវស្សាដល់ព្រះសង្ឃ៨៩អង្គ រួចមក ឯកឧត្តមរដ្ឋមន្រ្តី និងក្រុមគ្រួសារ ព្រមទាំងសហការី បានអញ្ជើញបង្សុកូលនៅចេតិយឧបាសក ព្រុំ សុន និងឧបាសិកា ស៊ុន យុត ជាមាតាបិតា និងចេតិយលោកវេជ្ជបណ្ឌិត ចាន់ ស៊ីវ៉ាន់ថា ព្រមទាំងនិមន្តព្រះសង្ឃធ្វើបទមនសិការព្រះរតនត្រៃចម្រើនព្រះបរិត្ត ដើម្បីឧទ្ទិសមនុញ្ញផលជូនដល់បុព្វការីជនមាន មាតា បិតា ជីដូន ជីតា និងញាតិការគ្រប់ៗសណ្តានផងដែរ។ នាឱកាសនោះ ឯកឧត្តមរដ្ឋមន្រ្តី និងក្រុមគ្រួសារបានជូនតាជីយាយជីចំនួន ៣០នាក់ ក្នុងម្នាក់ទទួលបានថវិកា២ម៉ឺនរៀលផងដែរ ៕
