ឯកឧត្តមបណ្ឌិត ហ៊ុន ម៉ាណែត និងលោកជំទាវ ឧបត្ថម្ភថ្លៃព្យាបាលជូនលោកយាយ ហ៊ាន ឃៀម មានជំងឺខ្សោយបេះដូង រលាកសួត និងហើមសួត
ភ្នំពេញ៖ លោកយាយ ហ៊ាន ឃៀម អាយុ ៧៥ឆ្នាំ រស់នៅភូមិព្រែកតាប្រាំង ឃុំភូមិធំ ស្រុកល្វាឯម ខេត្តកណ្ដាល មានអាការហត់ ថប់ដង្ហើម ដោយសារ ជំងឺខ្សោយបេះដូង រលាកសួត និងហើមសួត ហើយត្រូវបានបញ្ជូនមកព្យាបាលនៅមន្ទីរពេទ្យមិត្តភាពកម្ពុជា-ចិនព្រះកុសុមៈ ផ្នែកជំងឺបេះដូង និងសរសៃឈាម។
ក្រោយពីសម្រាកព្យាបាល និងតាមដានពីសំណាក់ក្រុមគ្រូពេទ្យជំនាញរួចមក លោកយាយចាប់ផ្ដើមស្រស់បស់ឡើងវិញពីមួយថ្ងៃទៅមួយថ្ងៃ ឥទ្បូវត្រូវបានអនុញ្ញាតឱ្យត្រលប់ទៅផ្ទះវិញហើយ។
ដោយមានជីវភាពខ្វះខាត ទើបលោក ហ៊ាន ម៉ៅ ដែលត្រូវជាកូនរបស់លោកយាយ បានគោរពស្នើសុំមកឯកឧត្តមបណ្ឌិត ហ៊ុន ម៉ាណែត ដើម្បីជួយក្នុងការព្យាបាលម្តាយរបស់គាត់។ ឯកឧត្តមបណ្ឌិត ក៏បានធ្វើការឆ្លើយតប ប្រកបដោយទឹកចិត្តសប្បុរសដ៏ខ្ពង់ខ្ពស់ ចាត់ឱ្យក្រុមគ្រូពេទ្យ TYDA ជួយព្យាបាលលោកយាយ ហ៊ាន ឃៀម រហូតទទួលបានភាពធូរស្បើយ និងល្អប្រសើរឡើងវិញ។
សូមបញ្ជាក់បន្ថែមថា ការចំណាយទាំងអស់ទាំងក្នុងការព្យាបាល ការស្នាក់នៅ និងហូបចុក ត្រូវឧបត្ថម្ភទំនុកបម្រុងដោយ ឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ។
