នាយឧត្តមសេនីយ៍ គៀត ច័ន្ទថារិទ្ធ ដឹកនាំគណៈប្រតិភូកម្ពុជាទៅចូលរួមកិច្ចប្រជុំប្រចាំឆ្នាំ អាស៊ាន DGICM លើកទី២៦ រហូតចប់ជាស្ថាពរប្រកបដោយជោគជ័យ

ភ្នំពេញ៖ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ នៃព្រះរាជាណាចក្រកម្ពុជា នៅថ្ងៃទី១០ ខែសីហា ឆ្នាំ២០២៣ បានដឹកនាំគណៈប្រតិភូកម្ពុជាទៅចូលរួមកិច្ចប្រជុំប្រចាំឆ្នាំ អាស៊ាន DGICM លើកទី២៦ រហូតចប់ជាស្ថាពរប្រកបដោយជោគជ័យ។

កិច្ចប្រជុំត្រូវបានប្រារព្ធធ្វើនៅទីក្រុងភូកេត ប្រទេសថៃ រយៈពេល ៣ថ្ងៃ ដោយគិតចាប់ពីថ្ងៃទី៨ ដល់ទី១០ ខែសីហា ឆ្នាំ២០២៣ ក្នុងនោះមាន៖ កិច្ចប្រជុំអគ្គនាយកអន្តោប្រវេសន៍ និង ប្រធានកុងស៊ុល នៃបណ្តាប្រទេសអាស៊ានទាំងអស់ ក្រោមប្រធានបទ “ពង្រឹងសន្តិសុខ បង្កើនកិច្ចសហប្រតិបត្តិការ និងចិរភាពអនាគត” ទទួលបានលទ្ធផលដូចខាងក្រោម៖ ទទួលយកប្រទេសទីម័រឡេស្តេ ចូលរួមប្រជុំក្នុងឋានៈជាអ្នកសង្កេតការណ៍លើកទីមួយ។

បញ្ជាក់ឡើងវិញពីការតាំងចិត្តរបស់សមាជិកអាស៊ានទាំងអស់ក្នុងការបន្តពង្រឹងសន្តិសុខតាមព្រំដែន និងធ្វើឱ្យប្រសើរឡើងនូវកិច្ចសហការក្នុងតំបន់លើការងារអន្តោប្រវេសន៍។ ការប្រឈមនឹងនិន្នាការ នៃការជួញដូរមនុស្សក្នុងតំបន់ និងការឆ្លើយតបទៅនឹងបទឧក្រិដ្ឋផ្សេងៗ និងកត់សម្គាល់ពីការរីកចម្រើនថ្មីៗក្នុងបណ្តាប្រទេសអាស៊ាន និងបានផ្លាស់ប្តូរយោបល់លើការខិតខំប្រឹងប្រែងការងារអន្តោប្រវេសន៍ ការងារកុងស៊ុល និងការគ្រប់គ្រងព្រំដែនថ្នាក់ជាតិ ថ្នាក់តំបន់ និងពិភពលោកទាំងមូល។ កិច្ចប្រជុំក៏បានអនុម័តលើឯកសារណែនាំមួយចំនួនផងដែរមុននឹងបិទបញ្ចប់ជាស្ថាពរប្រកបដោយសាមគ្គីភាព ភាពស្និទ្ធស្នាល និងរីករាយ។

ក្នុងនោះក៏មានកិច្ចប្រជុំលើកទី១៨ អគ្គនាយកអន្តោប្រវេសន៍ និងប្រធានកុងស៊ុលអាស៊ាន បូក ប្រទេសអូស្ដ្រាលី (18th DGICM+Australia) និងកិច្ចប្រជុំលើកទី២ អគ្គនាយកអន្តោប្រវេសន៍ និងប្រធានកុងស៊ុលអាស៊ាន បូក ៣ (ចិន ជប៉ុន កូរ៉េ) (2nd DGICM+3 CONSULTATION ) ទីក្រុងភូកេត ប្រទេសថៃ ដែលក្នុងនោះបានលើកឡើងពីការពង្រឹកកិច្ចសហប្រតិបត្តិការកាការពារសន្តិសុខតាមព្រំដែន ការចែករំលែកព៌ត័មាន និងការផ្តល់វគ្គបណ្តុះបណ្តាលដល់មន្ត្រីអន្តោប្រវេសន៍នៃបណ្តាប្រទេសអាស៊ាន។

ជាមួយនោះ ឯកឧត្តម នាយឧត្តមសេនីយ៍ អគ្គនាយក ក៏បានជួបប្រជុំទ្វេរភាគីជាមួយចិន និងឥណ្ឌូនេស៊ីផងដែរ ដែលក្នុងកិច្ចប្រជុំបានលើកឡើងពីការពង្រឹង និងធ្វើឱប្រសើរឡើងនូវកិច្ចសហប្រតិបត្តិការការពារ ទប់ស្កាត់ និងបង្ក្រាបរាល់បទល្មើសអន្តោប្រវេសន៍ផ្សេងៗ។ កិច្ចប្រជុំនោះក៏បានលើកឡើងពីបញ្ហាប្រឈមមួយចំនួនទាក់ទងការជួញដូរកម្លាំងពលកម្ម និងការជួញដូរមនុស្សផងដែរ ៕