ឯកឧត្តម ឃួង ស្រេង ជំរុញឱ្យអាជ្ញាធរខណ្ឌទាំង១៤ បន្ដចូលរួមដាំដើមឈើ និងថែរក្សា ដើម្បីឱ្យរាជធានីភ្នំពេញរក្សាបាននូវភាពបៃតងស្រស់ស្អាត

ភ្នំពេញ៖ ឯកឧត្តម ឃួង ស្រេង ក៏បានជំរុញឱ្យអាជ្ញាធរខណ្ឌទាំង១៤ ថែរក្សាដើមឈើឱ្យ បានគង់វង្ស ដោយក្រោយការដាំ ត្រូវធ្វើរបាយការណ៍ ៣ខែម្តង មករដ្ឋបាលរាជធានីភ្នំពេញ ជុំវិញការដាំដើមឈើនៅក្នុងមូលដ្ឋានរបស់ខ្លួន ដើម្បីឱ្យ បានដឹង ថា ដើមឈើរស់ ឬងាប់ ងាយស្រួលយើងបានដាំបន្ថែម ធ្វើយ៉ាងណាឱ្យរាជធានីភ្នំពេញរក្សាបាននូវភាពបៃតង ស្រស់ស្អាត។​ឯកឧត្តម ឃួង ស្រេង បានជំរុញឱ្យអាជ្ញាធរខណ្ឌទាំង១៤ ថែរក្សាដើមឈើ ឱ្យបានគង់វង្ស និងធ្វើរបាយការណ៍៣ខែម្តង មករដ្ឋបាលរាជធានីភ្នំពេញ ជុំវិញការវិវឌ្ឍ នៃការដាំដើមឈើនៅក្នុងមូលដ្ឋានរបស់ខ្លួន ដើម្បីធ្វើយ៉ាងណាឱ្យដើមឈើអាចរស់ នៅដោយភាពគង់វង្ស និងរក្សាបានជាទីក្រុងមានពណ៌បៃតង។​

ការជំរុញបែបនេះ នៅក្នុងពិធីដាំ និងចែកកូនឈើជាង២០០០ដើម ដើម្បីអបអរសាទរ “រុក្ខទិវា” ០៩ កក្កដា ឆ្នាំ២០២៣ នៅក្នុងបរិវេណសាលាបឋមសិក្សាទ្រនំជ្រឹង សង្កាត់បឹងធំ ខណ្ឌកំបូលកាលពីព្រឹកថ្ងៃទី១១ ខែសីហា ឆ្នាំ២០២៣នេះ។​

ឯកឧត្តម ឃួង ស្រេង បានមានប្រសាសន៍ថា ពិធីដាំ និងចែកកូនឈើ ជាង២០០០ដើម ដើម្បីអបអរសាទរ “រុក្ខទិវា” ០៩ កក្កដា នេះធ្វើឡើងដើម្បីបង្ហាញពីស្មារតីយកចិត្តទុកដាក់ ក្នុងការថែរក្សាព្រៃឈើ ធ្វើឱ្យភ្នំពេញមានពណ៌បៃតងស្រស់ស្អាត និងដើម្បីទាក់ទាញ ភ្លៀវទេសចរ ជាតិ អន្ដរជាតិ ចូលមកទស្សនាកម្ពុជាកាន់តែច្រើនបន្ថែមទៀត។​ឯកឧត្តមបានបន្តថា ព្រៃឈើមានអត្តប្រយោជន៍ច្រើនណាស់ ដូចជាផ្តល់ជា ជម្រកសត្វព្រៃផ្តល់អ៊ុកស៊ីសែន និងការទប់ទល់ការប្រែប្រួលអាកាសធាតុជាដើម។ ព្រៃឈើ មានតម្លៃមិនអាចកាត់ថ្លៃបាន ដូច្នេះយើងត្រូវថែទាំនិងរក្សាព្រៃឈើឱ្យ បានគង់វង្សទាំង អស់គ្នា។​

ឯកឧត្តម ឃួង ស្រេង បានមានប្រសាសន៍បន្តទៀតថា ពិធីដាំ និងចែកកូនឈើ ដើម្បីអបអរសាទរ “រុក្ខទិវា” ០៩ កក្កដា ឆ្នាំ២០២៣ នាពេលនេះ មានជាង២០០០ ដើម ដោយ២៣០ដើម ចែកនៅតាមវត្តអារាម និងសាលារៀន និងចំនួន៩០០ ដើមផ្សេង ទៀត សម្រាប់ចែកនៅទូទាំង ១៤ខណ្ឌ និងសម្រាប់បងប្អូនប្រជាពលរដ្ឋ៥០០ដើមផ្សេង ទៀតផងដែរ។ ជាមួយនេះ យើងក៏បានត្រៀមកូនឈើគ្រប់ប្រភេទចំនួន ៣៥០០០ ដើមទៀត សម្រាប់ចែកជូនប្រជាពលរដ្ឋយកទៅដាំនៅតាមដងផ្លូវសាធារណៈ។​ឯកឧត្តម ឃួង ស្រេង ក្នុងឱកាសនោះ ក៏បានជំរុញ អាជ្ញាធរខណ្ឌទាំងអស់ លើកទឹកចិត្តឱ្យប្រជាពលរដ្ឋចូលរួមដាំដើមឈើ យ៉ាងហោចណាស់ក្នុងមួយខណ្ឌយ៉ាងតិច ២០០ដើម។