រដ្ឋមន្រ្តីការបរទេសចិន ដឹកនាំគណៈប្រតិភូចាកចេញពីកម្ពុជាហើយ ក្រោយពីបានបំពេញទស្សនកិច្ចប្រកបដោយផ្លែផ្កា រយៈពេល០២ថ្ងៃនៅកម្ពុជា

ភ្នំពេញ៖ ឯកឧត្តម វ៉ាង យី (WANG Yi) សមាជិកការិយាល័យនយោបាយ និងជាប្រធានការិយាល័យគណៈកម្មការកិច្ចការបរទេស នៃគណៈកម្មាធិការមជ្ឈិមបក្សកុម្មុយនីស្តចិន និងជារដ្ឋមន្រ្តីការបរទេស នៃសាធារណរដ្ឋប្រជាមានិតចិន នាល្ងាចថ្ងៃទី១៣ ខែសីហា ឆ្នាំ២០២៣ បានដឹកនាំគណៈប្រតិភូចាកចេញពីព្រះរាជាណាចក្រកម្ពុជាហើយ។

ឯកឧត្តម វ៉ាង យី បានមកដល់ព្រះរាជាណាចក្រកម្ពុជា នៅវេលាម៉ោងជាង៣រសៀលម្សិលមិញ ដើម្បីបំពេញទស្សនកិច្ចផ្លូវការនៅកម្ពុជា រយៈពេល០២ថ្ងៃ តបតាមការអញ្ជើញរបស់ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ។

ក្នុងអំឡុងដំណើរទស្សនកិច្ចនៅកម្ពុជា ឯកឧត្តម វ៉ាង យី បានចូលក្រាបបង្គំគាល់ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ព្រមទាំងបានចូលជួបសម្តែងការគួរសមដាច់ដោយឡែកជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងឯកឧត្ដមកិត្តិទេសាភិបាល បណ្ឌិត ហ៊ុន ម៉ាណែត នាយករដ្ឋមន្រ្តីចាត់តាំង នៃព្រះរាជាណាចក្រកម្ពុជា ផងដែរ។ ក្រៅពីនោះ ឯកឧត្តម វ៉ាង យី ក៏បានជួបពិភាក្សាជាមួយមន្រ្តីជាន់ខ្ពស់កម្ពុជាមួយចំនួនផងដែរ ៕