កងទ័ពជើងទឹករុស្ស៊ី បាញ់ព្រមានលើកប៉ាល់ដឹកទំនិញនៅសមុទ្រខ្មៅ
បរទេស៖ ឧប្បត្តិហេតុកើតឡើងបន្ទាប់ពីការដួលរលំនៃកិច្ចព្រមព្រៀងដែលធានាថាការនាំចេញគ្រាប់ធញ្ញជាតិអ៊ុយក្រែនអាចបន្ត។
ក្រសួងការពារជាតិរុស្ស៊ីបានឲ្យដឹងកាលពីថ្ងៃអាទិត្យថា នាវាចម្បាំងរុស្ស៊ីមួយគ្រឿងបានបាញ់ព្រមានទៅលើកប៉ាល់ដឹកទំនិញដែលកំពុងធ្វើដំណើរទៅកាន់កំពង់ផែ Izmail ភាគខាងត្បូងប្រទេសអ៊ុយក្រែន។
ក្រសួងការពារជាតិរុស្ស៊ីបានសរសេរនៅលើ Telegram ថា ដើម្បីបង្ខំឱ្យនាវាឈប់ ការបាញ់ព្រមានត្រូវបានបាញ់ដោយអាវុធស្វ័យប្រវត្តិស្រាលពីនាវាចម្បាំងរុស្ស៊ី។
យោងតាមទីក្រុងមូស្គូ ប្រធានកប៉ាល់ដែលមានទង់ជាតិ Palau ឈ្មោះ Sukru Okan មិនបានឆ្លើយតបទៅនឹងការបញ្ជាឱ្យឈប់សម្រាប់ ការត្រួតពិនិត្យទាក់ទងនឹងការដឹកជញ្ជូនទំនិញហាមឃាត់នោះទេ។
យោងតាមប្រភពព័ត៌មានដដែល បានឲ្យដឹងថា ឧទ្ធម្ភាគចក្រដែលមានបុគ្គលិកយោធារុស្ស៊ីនៅលើនោះ បានហោះឡើងដើម្បីត្រួតពិនិត្យនាវា ដែលត្រូវបានអនុញ្ញាតឱ្យបន្តដំណើររបស់ខ្លួនទៅកាន់កំពង់ផែអ៊ុយក្រែន។
ដំណឹងនៃការជួបគ្នានេះកើតឡើងនៅពេលដែលអ៊ុយក្រែនចាប់ផ្តើមចុះបញ្ជីកប៉ាល់ដែលមានបំណងប្រើប្រាស់ ច្រករបៀងមនុស្សធម៌ សុវត្ថិភាព ដែលវាកំពុងព្យាយាមបង្កើតនៅសមុទ្រខ្មៅ ក្នុងគោលបំណងអនុញ្ញាតឱ្យកប៉ាល់ដឹកទំនិញដែលជាប់គាំងអាចចេញដំណើរបាន។
វានៅមិនទាន់ច្បាស់ថា តើរុស្ស៊ីនឹងទទួលស្គាល់ឬក៏គោរពផែនការនេះដែរឬទេ។
កំពង់ផែទន្លេ Izmail ក្នុងតំបន់ Odessa បានក្លាយជាផ្លូវចេញដ៏សំខាន់មួយសម្រាប់ផលិតផលកសិកម្មរបស់អ៊ុយក្រែន ចាប់តាំងពីទីក្រុងម៉ូស្គូបានបញ្ចប់កិច្ចព្រមព្រៀងស្តីពីការនាំចេញគ្រាប់ធញ្ញជាតិ។
នៅពាក់កណ្តាលខែកក្កដា ទីក្រុងមូស្គូបានលុបចោលកិច្ចព្រមព្រៀងដែលអនុញ្ញាតឱ្យគ្រាប់ធញ្ញជាតិអ៊ុយក្រែនចាកចេញពីកំពង់ផែភាគខាងត្បូងរបស់ប្រទេសចាប់តាំងពីរដូវក្តៅមុន បើទោះបីជាមានការបិទផ្លូវដោយរុស្ស៊ីក៏ដោយ។
ប៉ុន្មានថ្ងៃក្រោយមក នៅថ្ងៃទី១៩ ខែកក្កដា ទីក្រុងមូស្គូបានព្រមានថា កប៉ាល់ណាដែលធ្វើដំណើរទៅ ឬមកពីកំពង់ផែអ៊ុយក្រែន នឹងត្រូវបានចាត់ទុកថាជាគោលដៅដ៏មានសក្តានុពល។ ក្រុង Kiev បានប្រតិកម្មនៅថ្ងៃបន្ទាប់ដោយនិយាយដូចគ្នានឹងអនុវត្តចំពោះកប៉ាល់រុស្ស៊ី។
ចាប់តាំងពីពេលនោះមក ចំនួននៃការវាយប្រហារនៅសមុទ្រខ្មៅបានកើនឡើងលើភាគីទាំងសងខាង ហើយកងទ័ពរុស្ស៊ីបានវាយលុក Odessa ដែលជាកំពង់ផែដ៏សំខាន់នៅភាគខាងត្បូងអ៊ុយក្រែន ក៏ដូចជាកំពង់ផែទន្លេ Izmaïl និង Reni ជាច្រើនលើកច្រើនសារ ការវាយប្រហារបានបរិហារដោយទីក្រុង Kiev ថាជាមធ្យោបាយរារាំងការនាំចេញរបស់ខ្លួន។
អ៊ុយក្រែនបានវាយប្រហារកំពង់ផែ Novorossiysk របស់រុស្ស៊ី និងកប៉ាល់រុស្ស៊ីជាច្រើនគ្រឿងនៅសមុទ្រខ្មៅ រួមទាំងនាវាដឹកប្រេង។
ប្រភព៖ Euro News
ប្រែសម្រួលដោយ៖ {ឡាយ លីហួ}
https://www.euronews.com/2023/08/13/russian-navy-fires-warning-shots-at-cargo-ship-in-black-sea
