ឯកឧត្តម ជា សុមេធី អញ្ជើញបញ្ចុះបឋមសិលាសាងសង់អគាររដ្ឋបាល១ខ្នង នៅសាលានគរបាលជាតិភូមិភាគ២ ស្ថិតក្នុងស្រុកព្រៃឈរ

ភ្នំពេញ៖ ឯកឧត្តម ជា សុមេធី អភិបាលខេត្តព្រៃវែង និងលោកជំទាវ ជា ផល្គុន រួមទាំងសាច់ញាតិ នៅថ្ងៃទី១៤ ខែសីហា ឆ្នាំ២០២៣ បានអញ្ជើញជាអធិបតីបញ្ចុះបឋមសិលាសាងសង់អគាររដ្ឋបាល១ខ្នង នៅសាលានគរបាលជាតិភូមិភាគ២ ស្ថិតក្នុងស្រុកព្រៃឈរ ខេត្តកំពង់ចាម។

ពិធីនេះក៏មានការចូលរួមពីសំណាក់ឯកឧត្តម លោកជំទាវ អភិបាលរងខេត្ត មន្ទីរអង្គភាព កងកម្លាំងទាំងបី នាយក នាយករង មន្រ្តីសាលា និងសិស្សនាយនគរបាល នាយនគរបាលរងជាច្រើននាក់ផងដែរ។

ចំពោះការកសាងនៅអាគាររដ្ឋបាល ដល់សាលានគរបាលជាតិភូមិភាគ២នេះ គឺជាការចូលរួមចំណែកមួយយ៉ាងសំខាន់ ក្នុងការបម្រើដល់កិច្ចការងាររបស់សាលានគរបាលជាតិភូមិភាគ២ ខេត្តកំពង់ចាមនេះ ដើម្បីឲ្យមានកន្លែងធ្វើការងារ ល្អ ស្អាត និងមានផាសុខភាព និងជួយពង្រឹងគុណភាពការងារ នៃសាលានគរបាលជាតិភូមិភាគ២ នេះឲ្យកាន់តែល្អប្រសើរឡើងបន្ថែមទៀត។

ក្នុងឱកាសនោះ ឯកឧត្តម ជា សុមេធី អភិបាលខេត្ត បានសម្ដែងក្ដីសង្ឃឹមថា សិស្សនាយនគរបាល នាយនគរបាលរងទាំងអស់ ដែលកំពុងសិក្សានៅទីនេះ នឹងសម្រេចបានបេសកម្មដ៏ឧត្តុង្គឧត្តមនេះ ដោយចាត់ទុកការសិក្សារៀនសូត្រនេះថា ជាបេសកកម្មបម្រើជាតិ បម្រើប្រជាពលរដ្ឋ។ ក្រៅពីនេះ ឯកឧត្តមអភិបាលខេត្ត ក៏បានលើកទឹកចិត្តដល់ថ្នាក់ដឹកនាំ លោកគ្រូ និងមន្រ្តីនៃសាលានគរបាលជាតិភូមិភាគ២ បន្តការខិតខំបណ្ដុះបណ្ដាលធនធានកងកម្លាំងនគរបាលជាតិប្រកបដោយគុណភាពបន្ថែមទៀត។

ឯកឧត្តមអភិបាលខេត្ត ក៏បានអញ្ជើញចុះពិនិត្យអគារស្នាក់នៅរបស់សិស្សនាយនគរបាល នាយនគរបាលរង ដែលកំពុងតែសម្រាកសិក្សារៀនសូត្រនៅទីនោះ និងទីកន្លែងផ្សេងៗទៀត នៅក្នុងសាលានគរបាលជាតិភូមិភាគ២នេះផងដែរ ៕