ឯកឧត្តម ប៊ិន ឈិន ថ្លែងអំណរគុណថ្នាក់ដឹកនាំជាតិ មន្ត្រីរាជការ អ្នកឧកញ៉ា ឧកញ៉ា សម្រាប់ការជូនពរក្នុងឱកាសថ្ងៃខួបកំណើត

ភ្នំពេញ៖ ឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្ត្រីប្រចាំ​ការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានគូសបញ្ជាក់ថា បានទទួលរួច​ហើយ​នូវសារលិខិតជូនពរក្នុងឱកាសខួបកំណើតគម្រប់ ៧៣ឆ្នាំ ឈានចូល ៧៤ឆ្នាំ តាមរយៈសារលិខិត និងតាមបណ្តាញផ្សព្វផ្សាយសង្គម។

ឯកឧត្តមឧបនាយករដ្ឋមន្ត្រី ប៊ិន ឈិន សូមថ្លែងអំណរគុណប្រកបដោយមនោ​សញ្ចេតនាយ៉ាងជ្រាលជ្រៅបំផុត​ជូនចំពោះសម្តេច ឯឧត្តម លោកជំទាវ អ្នកឧកញ៉ា ឧកញ៉ា លោក លោកស្រីទាំងអស់ សម្រាប់ការជូនពរសព្ទសាធុ​ការប្រកបដោយអត្ថន័យ និងការស្រឡាញ់រាប់អានយ៉ាងជ្រាលជ្រៅបំផុត។

ទន្ទឹមនឹងការថ្លែងអំណរគុណ ឯកឧត្តមឧបនាយករដ្ឋមន្ត្រី ប៊ិន ឈិន ក៏សូមគោរពជូនពរសម្តេច ឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី ព្រមទាំងក្រុមគ្រួសារ សូមមានសុខភាពល្អបរិបូរណ៍ កម្លាំងពលំមាំមួន ដើម្បីរួមចំណែកក្នុងការដឹកនាំ និងកសាងប្រទេសកម្ពុជា ឆ្ពោះទៅរកភាពរីកចម្រើនជឿនលឿនទៅមុខជាបន្តបន្ទាប់ទៀត។

ឯកឧត្តមឧបនាយករដ្ឋមន្ត្រី ក៏សូមបួងសួងដល់វត្ថុស័ក្តិសិទ្ធក្នុងលោកមេត្តាប្រោសព្រំជូន សម្តេច ឯកឧត្តម លោកជំទាវ អ្នកឧកញ៉ា ឧកញ៉ា លោក លោកស្រី ព្រមទាំងក្រុមគ្រួសារ សូមទទួលបាននូវសព្ទសាធុការពរ សិរីមហាប្រសើរ ពិសេសអាយុយឺនយូរ និងសមប្រកបតែនឹងពុទ្ធពរទាំងបួនប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។

សូមបញ្ជាក់ថា នៅក្នុងឱកាសចម្រើនជន្មាយុគម្រប់ ៧៣ឆ្នាំ ឈានចូល ៧៤ឆ្នាំ របស់ឯកឧត្តមកិត្តិនីតិកោសលបណ្ឌិត ប៊ិន ឈិន មានថ្នាក់ដឹកនាំស្ថាប័នកំពូលៗរបស់ជាតិ រួមមានសម្តេចវិបុលសេនាភក្តី សាយ ឈុំ សម្តេចតេជោ ហ៊ុន សែន ព្រមទាំងថ្នាក់ដឹកនាំ មន្ត្រីរាជការ នៅតាមក្រសួងស្ថាប័នជាច្រើន បានផ្ញើសារចូលរួមអបអរសាទរក្នុងថ្ងៃប្រកប​ដោយមហានក្ខតឫក្ស និងជ័យមង្គលនេះ ៕