អនុរដ្ឋលេខាធិការ ក្រសួងបរិស្ថាន ដឹកនាំកិច្ចប្រជុំក្រុមការងារបច្ចេកទេស ការប្រើប្រាស់ និងផលិតកម្មដោយនិរន្តរភាព
ភ្នំពេញ៖ នាយកដ្ឋានសេដ្ឋកិច្ចបៃតង នៃអគ្គនាយកដ្ឋានគោលនយោបាយ និងយុទ្ធសាស្រ្ត ក្រសួងបរិស្ថាន បានសហការជាមួយ ទីភ្នាក់ងារកិច្ចសហប្រតិបត្តិការអន្តរជាតិ GIZ បានរៀបចំកិច្ចប្រជុំក្រុមការងារបច្ចេកទេសលើកទី៦ របស់ក្រុមការងារបច្ចេកទេស ការប្រើប្រាស់និងផលិតកម្មដោយនិរន្តរភាព(SCP) ដែលដឹកនាំនិងសម្របសម្រួលដោយ លោកជំទាវ ងិន លីណា អនុរដ្ឋលេខាធិការ ក្រសួងបរិស្ថាន និងជាប្រធានក្រុមការងារSCP នៅកម្ពុជា អ្នកនាង វីឡាសីនី ភូនុច អភ័យ សហនាយិកាគម្រោង ទីភ្នាក់ងារកិច្ចសហប្រតិបត្តិការអាល្លឺម៉ង់ (GIZ) នៅប្រទេសថៃ រួមជាមួយសមាជិកក្រុមការងារបច្ចេកទេស SCP ជាច្រើននាក់ផងដែរ។
កិច្ចប្រជុំនេះ រៀបចំឡើងក្នុងគោលបំណង៖ (១) បង្ហាញពីស្ថានភាពនៃការវិវត្តន៍ SCP នៅកម្ពុជា និងវិធីសាស្ត្រដែលក្រុមការងារអាចគាំទ្រ ទាំងក្នុងក្របខ័ណ្ឌច្បាប់ (២) ផ្លាស់ប្តូរផែនការសកម្មភាព យុទ្ធសាស្ត្រ គោលនយោបាយ និងបទបញ្ញត្តិ ទាក់ទងនឹងលទ្ធកម្មសាធារណៈប្រកបដោយចីរភាព (SPP) និងស្លាកសញ្ញាបរិស្ថាន (Ecolabel) និង(៣) ពិភាក្សាកត្តាចំបង ដែលក្រុមការងារអាចជំរុញគោលដៅអភិវឌ្ឍន៍ដោយចីរភាពទី១២ ឱ្យកាន់តែសិទ្ធិភាពបន្ថែមទៀត។
ក្នុងឱកាសនោះ ក្រុមការងារ SCPបានបង្ហាញពីវឌ្ឍនភាពការងារក្នុងត្រីមាសទី១ និងទី២ ដែលក្នុងនោះមានការរៀប សិក្ខាសាលាស្តីពីលក្ខណៈវិនិច្ឆ័យ នៃការអភិវឌ្ឍផលិតផលបរិស្ថាន ដែលក្នុងនោះមានផលិតផល ចំនួន២ប្រភេទ ដែលត្រូវបាន ជ្រើសយកមកអនុវត្តន៍ និងស្វែងយល់ពីដំណើរការ នៃលក្ខណៈវិនិច្ឆ័យ នៃការអភិវឌ្ឍផលិតផលបរិស្ថាន ឬសេវាកម្ម។
ជាមួយគ្នានេះ ក្រុមការងារ បានរៀបចំវគ្គបណ្តុះបណ្តាល បច្ចេកទេស ស្តីពីការវាយតម្លៃវដ្តជីវិតផលិតផល (Life Cycle Assessment “LCA”) និងបានរៀបចំពង្រាងចុងក្រោយ ផែនទីបង្ហាញផ្លូវស្តីពី SPP និង ផែនការសកម្មភាព ដែលបានបង្កើតឡើង និងរៀបចំសិក្ខាសាលាពិគ្រោះយោបល់ជាមួយក្រុមការងារបច្ចេកទេស SCP៕
