រដ្ឋលេខាធិការក្រសួងមហាផ្ទៃ៖ បញ្ហាគ្រឿងញៀនធ្វើឱ្យប៉ះពាល់ដល់សន្តិសុខសង្គម សេដ្ឋកិច្ច និងសុខុមាលភាពរបស់ប្រជាជន ដែលត្រូវរួមគ្នាដោះស្រាយនៅក្នុងតំបន់របស់យើង

ភ្នំពេញ៖ ឯកឧត្តម ប៊ុន ហ៊ុន រដ្ឋលេខាធិការក្រសួងមហាផ្ទៃ តំណាងកម្ពុជាថ្លែងបែបនេះ ក្នុងឱកាសដឹកនាំប្រតិភូកម្ពុជាចូលរួមកិច្ចប្រជុំគណកម្មការមន្រ្តីជាន់ខ្ពស់ នៃប្រទេសហត្ថលេខីអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការត្រួតពិនិត្យគ្រឿងញៀន នៅក្នុងប្រទេសមហាអនុតំបន់ទន្លេមេគង្គ កាលពីល្ងាចថ្ងៃទី៦ ខែកញ្ញា ឆ្នាំ២០២៣ នាទីក្រុងប៉េកាំង ប្រទេសចិន។

ក្នុងនាមស្ថាប័នត្រួតពិនិត្យគ្រឿងញៀនកម្ពុជា ក្នុងឱកាសនោះ ឯកឧត្តម ប៊ុន ហ៊ុន មានប្រសាសន៍ថាបញ្ហាគ្រឿងញៀន ធ្វើឱ្យប៉ះពាល់ដល់សន្តិសុខសង្គម ការអភិវឌ្ឍនសេដ្ឋកិច្ច និងសុខុមាលភាពរបស់ប្រជាជន សហការរួមគ្នាក្នុងការដោះស្រាយបញ្ហាគ្រឿងញៀននៅក្នុងតំបន់របស់យើង។ ជាការឆ្លើយតបនិងបញ្ហានេះ គឺយើងត្រូវយកចិត្តទុកដាក់ពង្រឹងយន្តការដែលមានស្រាប់ និងការបង្កើតវិធីសាស្រ្តថ្មីៗ សមស្រប ចាំបាច់នានាដើម្បីដោះស្រាយស្ថានភាពបច្ចុប្បន្នដើម្បីដោះស្រាយបញ្ហាគ្រឿងញៀន នៅក្នុងតំបន់របស់យើង។

ក្នុងឱកាសនោះដែរ ឯកឧត្តម ប៊ុន ហ៊ុន ថ្លែងបន្តទៀតថា កម្ពុជាបាននិងកំពុងអនុវត្តយ៉ាងសកម្ម នូវយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ដំណាក់កាលទី៨ ដែលដំណាក់កាលទី១ បានចាប់ផ្តើមតាំងពីឆ្នាំ២០១៧ ជាមួយនឹងវិធីសាស្រ្តពហុវិស័យ ពហុភាគី ស្របតាមផែនការសកម្មភាពអនុតំបន់ ដោយផ្តោតលើការទប់ស្កាត់ ការអប់រំ ការព្យាបាល ស្តារនីតិសម្បទាអ្នកញៀនគ្រឿងញៀន និងការអនុវត្តច្បាប់ ដើម្បីទប់ស្កាត់ការផលិត និងការជួញដូរគ្រឿងញៀនខុសច្បាប់ក្នុងតំបន់ និងលើកកម្ពស់សុខុមាលភាពរបស់ប្រជាពលរដ្ឋ និងសន្តិសុខសង្គម។

ជាមួយគ្នានេះ ឯកឧត្តម ប៊ុន ហ៊ុន បានថ្លែងសង្កត់ធ្ងន់ថា ក្នុងរយៈពេលប៉ុន្មានឆ្នាំចុងក្រោយនេះ ប្រទេសក្នុងតំបន់បានបន្តយកចិត្តទុកដាក់ និងខិតខំប្រឹងប្រែងអនុវត្តផែនការសកម្មភាពអនុតំបន់ ស្តីពីការត្រួតពិនិត្យគ្រឿងញៀន ក្រោមការគាំទ្រផ្នែកបច្ចេកទេសរបស់ UNODC រួមទាំងយន្តការក្របខ័ណ្ឌកិច្ចសហប្រតិបត្តិការទ្វេភាគី ត្រីភាគី និងពហុភាគីផ្សេងទៀត ​បង្ក្រាប និង​រឹបអូស​គ្រឿងញៀន​នៅក្នុង​ប្រទេស​កម្ពុជា​ បាន​ច្រើន​សន្ធឹកសន្ធាប់ ដែលជាការគួរ​កត់​សម្គាល់​គ្រឿងញៀន​ទាំង​នោះ​មាន​ទិសដៅ​ទៅ​ប្រទេស​ផ្សេង​ទៀត​ក្នុង​តំបន់ហើយ រយៈពេលប៉ុន្មានឆ្នាំចុងក្រោយនេះដែរ ប្រទេសកម្ពុជាបានប្រែក្លាយពីប្រទេសឆ្លងកាត់នៃការជួញដូរ និងប្រើប្រាស់គ្រឿងញៀនតិចតួច ទៅជាប្រទេសឆ្លងដែននៃគ្រឿងញៀនយ៉ាងច្រើនពីប្រភពផ្សេងៗ ជាពិសេសតំបន់ត្រីកោណមាស ដែលគំរាមកំហែង និងប៉ះពាល់ដល់សុខុមាលភាព និងសណ្តាប់ធ្នាប់សង្គម។

ក្នុងនាមរាជរដ្ឋាភិបាលកម្ពុជា អាជ្ញាធរជាតិប្រយុទ្ធប្រឆាំងគ្រឿងញៀនឯកឧត្តម ប៊ុន ហ៊ុន បានថ្លែងគាំទ្រ និងវាយតម្លៃខ្ពស់ចំពោះលទ្ធផលនៃកិច្ចប្រជុំគណៈកម្មាធិការឧត្តមមន្ត្រីលើផែនការសកម្មភាពអនុតំបន់(SAP XII) ស្តីពីការត្រួតពិនិត្យគ្រឿងញៀន និងគាំទ្រយ៉ាងមុតមាំចំពោះសេចក្តីថ្លែងការណ៍របស់ទីក្រុងប៉េកាំង លើកិច្ចខិតខំប្រឹងប្រែងរួមគ្នាចំនួនបីទសវត្សរ៍ប្រយុទ្ធប្រឆាំងគ្រឿងញៀន នៅក្នុងតំបន់ទន្លេមេគង្គ និងគំនិតផ្តួចផ្តើមរបស់ប្រទេសចិន ស្តីពីការដោះស្រាយបញ្ហាគ្រឿងញៀន សំយោគនៅក្នុងមហាអនុតំបន់មេគង្គ ដោយប្រទេសហត្ថលេខីនៃអនុស្សរណៈនៃការយោគយល់គ្នាឆ្នាំ១៩៩៣ ស្តីពីការត្រួតពិនិត្យគ្រឿងញៀន នៅក្នុងមហាអនុតំបន់ទន្លេមេគង្គ ៕