ប្ដីប្រពន្ធជាបងប្អូនបង្កើតនិងគ្នា មានកូនដល់ទៅ ៨នាក់ សុទ្ធតែខ្សោយសតិបញ្ញាពីកំណើត
ភ្នំពេញ៖ ផ្ដើមចេញពីបងប្អូនបង្កើតក្នុងផ្ទៃម្ដាយតែមួយ បានយកគ្នាជាប្ដីប្រពន្ធ បណ្ដាលឱ្យកូនកើតមកទាំង៨នាក់ សុទ្ធតែខ្សោយសតិបញ្ញាពីកំណើត ហើយមានជីវភាពក្រលំបាកថែមទៀត។
គ្រួសារខាងលើនេះ មានប្ដីឈ្មោះ ធូ សាវន អាយុ ៦៥ ប្រពន្ធឈ្មោះ សេង សាវេត អាយុ៤៩ រស់នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត មានកូន៨នាក់ ក្នុងនោះប្រុស២នាក់។
ដោយឃើញពីទុក្ខលំបាកផ្ទួនៗបែបនេះ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃអាទិត្យ ទី ១០ ខែកញ្ញា ឆ្នាំ២០២៣នេះ បានចាត់លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា ចុះសួរសុខទុក្ខ និងនាំយកគ្រឿងឧបភោគបរិភោគ រួមទាំងម៉ូតូ១គ្រឿង កង់២គ្រឿង និងថវិកាមួយចំនួន ប្រគល់ជូនដល់គ្រួសារខាងលើនេះផងដែរ។
ក្នុងឱកាសនោះ លោកជំទាវ ម៉ែន នារីសោភ័គ ក៏បានពាំនាំនូវប្រសាសន៍ផ្ដាំផ្ញើសួរសុខទុក្ខ និងក្ដីនឹករលឹក ពិសេសនូវក្ដីអាណិត ស្រលាញ់ ចំពោះក្មួយៗផងដែរ ពីសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន។
លោកជំទាវ បានបន្ថែមថា បន្ទាប់ពីសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ទទួលបានដំណឹងពីទុក្ខលំបាក ពិសេសរឿងដែលកម្រងកើតមានឡើងសម្រាប់គ្រួសារប្ដីប្រពន្ធមួយគូនេះ មាតាមនុស្សធម៌ក៏បានចាត់លោកស្រីចុះមកសួរសុខទុក្ខ និងស្វែងយល់ពីបញ្ហាប្រឈម ឬភាពខ្វះខាត ដើម្បីឆ្លើយតបនឹងតម្រូវការដែលអាចជួយទៅក្មេងៗមានសតិស្មារតីមិនប្រក្រតីខាងលើនេះ។
លោកជំទាវបន្ដថា «អ្វីដែលជាការអាណិតអាសូរនោះ គឺកូនរបស់គាត់ទាំង៨នាក់ កើតមកសុទ្ធតែខ្សោយសតិបញ្ញាពីកំណើត ដែលទទួលរងការរើសអើង ការមើលងាយ និងបញ្ហាសុខភាព។ នេះជាកត្ដាចាំបាច់ណាស់ ដែលកាកបាទក្រហមកម្ពុជា ត្រូវយកចិត្ដទុក្ខដាក់»។
លោកជំទាវ គូសបញ្ជាក់ថា «ក្នុងគោលការណ៍កាកបាទក្រហមកម្ពុជា គឺមិនរើសអើង មិនទុក្ខម្នាក់ណាចោលនៅក្នុងសង្គម ពិសេសជួយដល់ជនដែលងាយរងគ្រោះបំផុត ដូចជា អ្នកដែលមានពិការភាព អ្នកផ្ទុកមេរោគអេដស៍ ឬជំងឺផ្សេងៗ ចាស់ជរាឥតទីពឹង និងស្ដ្រីមេម៉ាយមានកូនច្រើន គឺសុទ្ធតែនៅក្នុងគោលដៅរបស់កាកបាទក្រហមកម្ពុជា ត្រូវតែជួយ និងផាត់ពួកគាត់ចោលនៅក្នុងសង្គមនោះទេ»។
«បើងាកមកកាកបាទក្រហមកម្ពុជា ដែលទើបតែប្រារព្ធខួបលើកទី១៦០ ទិវាពិភពលោកកាកបាទក្រហម ៨ឧសភា ឆ្នាំ២០២៣ ក្រោមប្រធានបទ «រួមជាមួយកាកបាទក្រហមកម្ពុជា ដើម្បីបរិយាបន្នសង្គម»។ ប្រធានបទនេះ សំដៅធ្វើយ៉ាងណាឱ្យប្រជាជនរបស់យើងគ្រប់ស្រទាប់ ពិសេសជនដែលងាយរងគ្រោះបំផុត ហើយទទួលនូវភាពរើសអើងនៅក្នុងសង្គម ទទួលបានផលស្មើៗគ្នា នៅក្នុងសង្គមជាតិ។ ដូច្នេះការចុះមកជួយនេះ មិនមែនគាំទ្រការប្រព្រឹត្ដប្ដីប្រពន្ធស្រលាញ់បងប្អូនបង្កើតទេ តែក៏មិនផ្ដាច់គាត់ចេញពីសង្គម»។ នេះតាមការបញ្ជាក់បន្ថែមរបស់លោកជំទាវ។
សូមជម្រាបថា ប្ដីប្រពន្ធខាងលើនេះ បានបង្ហាញពីការស្ដាយក្រោយចំពោះទង្វើដែលខ្លួនបានប្រព្រឹត្ដខុស គឺយកបងប្អូនឯងបង្កើត ដែលបន្សល់នូវកូន៨នាក់សុទ្ធតែមានសតិស្មារតីមិនប្រក្រតី ធ្វើឱ្យពួកគាត់មិនអាចរំពឹងអ្វីបាននៅថ្ងៃអនាគតពីអត់ពីឪពុកម្ដាយ ។ លើសពីនោះ អ្នកទាំងពីរក៏បានអំពាវនាវ សូមកុំយកគំរូតាមគាត់ឱ្យសោះ៕
