សមត្ថកិច្ចចាប់ខ្លួនលោក ប៊ុត សីហា រួមនិងបក្ខពួកម្នាក់ទៀត ពាក់ព័ន្ធករណីគ្រឿងញៀន

កំពង់ស្ពឺ៖ លោក ប៊ុត សីហា អតីតម្ចាស់ជ័យលាភីលេខ១ របស់កម្មវិធីប្រឡងចម្រៀង The Voice Cambodia រដូវកាលទី១ ត្រូវសមត្ថកិច្ចឃាត់ខ្លួន រួមនិងបក្ខពួកម្នាក់ទៀត ករណីគ្រឿងញៀន។

ការឃាត់ខ្លួននេះធ្វើឡើង នៅចំណុចភូមិត្រាំខ្នា ឃុំស្នំក្រពើ ស្រុកគងពិសី ខេត្តកំពង់ស្ពឺ កាលពីរសៀលថ្ងៃទី១២ ខែកញ្ញា ឆ្នាំ២០២៣។

សមត្ថកិច្ចបានឲ្យដឹងថា ជនសង្ស័យទាំង២នាក់ រួមមាន៖
ទី១. ឈ្មោះ ឆន វល្លិន ភេទ ប្រុស អាយុ៣៨ឆ្នាំ មុខរបរមិនពិតប្រាកដ រស់នៅភូមិត្រាំខ្នា ឃុំស្នំក្រពើ ស្រុកគងពិសី។
ទី២. ឈ្មោះ ប៊ុត សីហា ភេទ ប្រុស អាយុ២៩ឆ្នាំ ដែលគេស្គាល់ច្បាស់ថា ជាតារាចម្រៀងប្រឡង ជាប់លេខ១ ក្នុងកម្មវិធីទូរទស្សន៍ រូបលោកនៅភូមិព្រះម្លប់ ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ។

នៅមុនពេលឃាត់ខ្លួនក្រុមជនសង្ស័យ កម្លាំងនគរបាល បានធ្វើការល្បាតតាមមូលដ្ឋាន ក៏ប្រទះឃើញក្រុមជនសង្ស័យទាំងពីរនាក់ ដោយមានការសង្ស័យ ក៏សួរនាំ និងឆែកឆេរ។

រកឃើញនិងដកហូតបានម្សៅក្រាមពណ៌សថ្លា សង្ស័យជាគ្រឿងញៀន ចំនួន០៥កញ្ចប់ ក្នុងនោះ (០៣តូច និង០២មធ្យម)ទូរស័ព្ទ០៣គ្រឿង និងឧបករណ៍ប្រើប្រាស់គ្រឿងញៀនមួយចំនួនទៀត និងឈានដល់ឃាត់ខ្លួនពួកគេតែម្ដង។

គួររំលឹកថា កាលពីល្ងាចថ្ងៃទី២១ ខែកុម្ភៈ ឆ្នាំ២០១៨ តារាចម្រៀង ប៊ុត សីហា ក៏ធ្លាប់ត្រូវបានសមត្ថកិច្ចចាប់ខ្លួន ពាក់ព័ន្ធនឹងករណីប្រើប្រាស់គ្រឿងញៀន ស្ថិតនៅមុខសាលាបឋមសិក្សាពងទឹក សង្កាត់ពងទឹក ខណ្ឌដង្កោ រាជធានីភ្នំពេញ។

ខណៈរូបលោកទៅទិញគ្រៀងញៀនដើម្បីជក់ ប៉ុន្តែត្រូវបានអាណាព្យាបាល និងក្រុមគ្រួសារ មកធានាយកទៅធ្វើការអប់រំ និងដាក់នៅកន្លែងបន្សាបគ្រឿងញៀន។

ស្ថានីយទូរទស្សន៍ហង្សមាស បានចេញមុខមកបកស្រាយថា លោក ប៊ុត សីហា បានប្រើប្រាស់គ្រឿងញៀនជាយូរមកហើយ។

ដោយក្នុងនោះ ខាងផលិតកម្ម ក៏ធ្លាប់បានហៅទៅណែនាំច្រើនដង ដើម្បីឲ្យកែខ្លួនដែរ ប៉ុន្តែលោក ប៊ុត សីហា មិនព្រមស្តាប់។

មិនតែប៉ុណ្ណោះថែមទាំង ធ្វើឲ្យផលិតកម្មខាតបង់ប្រាក់មួយចំនួន លើការចេញសងថ្លៃថតស្ពតពាណិជ្ជកម្ម និងការចុះកិច្ចសន្យាប្រគំតន្ត្រី ជាច្រើនលើកច្រើនសារដែលលោក ប៊ុត សីហា គេចវេសមិនបានចូលរួម។

លោក ប៊ុត សីហា បានប្រើប្រាស់គ្រឿងញៀន តាំងពីក្រោយលោកប្រឡងជាប់ជ័យលាភីលេខ១ ក្នុងកម្មវិធី «The Voice Cambodia» រដូវកាលទី១ បានរយៈពេលជាង៣ខែមកម្ល៉េះ។

បច្ចុប្បន្ន ជនសង្ស័យត្រូវបានសមត្ថកិច្ចកសាងសំណុំរឿងដើម្បីចាត់ការតាមនីតិវិធី ៕