ឧត្តមសេនីយ៍ឯក លន់ សុផាត នាំយកថវិការបស់ នាយឧត្តមសេនីយ៍ ស ថេត ចូលរួមរំលែកទុក្ខសពឧបាសក មាឃ ចន្ថា ត្រូវជាឪពុកក្មេករបស់ ឧត្តមសេនីយ៍ឯក សែម សុតាន់ ប្រធានអង្គភាពអន្តរាគមន៍

ភ្នំពេញ៖ ឯកឧត្តម ឧត្តមសេនីយ៍ឯក លន់ សុផាត អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នារសៀលថ្ងៃពុធ ១៣រោច ខែស្រាពណ៍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៣ ខែកញ្ញា ឆ្នាំ២០២៣ បាននាំយកថវិកាចំនួន ៥លានរៀល និងសារលិខិតរំលែកទុក្ខរបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ចូលរួមរំលែកទុក្ខសពមហាឧបាសកពុទ្ធសាសនូបត្ថម្ភន៍ មាឃ ចន្ថា ដែលត្រូវជាឪពុកក្មេករបស់ ឯកឧត្តម ឧត្តមសេនីយ៍ឯក សែម សុតាន់ ប្រធានអង្គភាពអន្តរាគមន៍។

ក្នុងឱកាសនោះ ឯកឧត្តម ឧត្តមសេនីយ៍ឯក លន់ សុផាត ក៏បាននាំនូវប្រសាសន៍ផ្តាំផ្ញើសួរសុខទុក្ខ និងចូលរួមរំលែកមរណទុក្ខពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ជូនចំពោះឯកឧត្តម ឧត្តមសេនីយ៍ឯក សែម សុតាន់ និងលោកជំទាវ ព្រមទាំងក្រុមគ្រួសារសព និងបានចាត់ទុកការបាត់បង់នូវឪពុក ឪពុកក្មេក និងជីតាជាទីស្រឡាញ់ ប្រកបដោយព្រហ្មវិហារធម៌ ដែលបានខិតខំប្រឹងប្រែងពុះពារគ្រប់ឧបសគ្គចិញ្ចឹមបីបាច់ថែរក្សា និងអប់រំណែនាំផ្តល់ដំបូន្មានដល់កូនចៅ គឺជាការបាត់បង់ដ៏ធំធេងបំផុតគ្មានអ្វីប្រៀបផ្ទឹមបាន ហើយក៏ជាការបាត់បង់នូវពុទ្ធសាសនិកដ៏គំរូផងដែរ។

តាងនាម ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ព្រមទាំងមន្រ្តីនគរបាលជាតិគ្រប់ជាន់ថ្នាក់ ឯកឧត្តម ឧត្តមសេនីយ៍ឯក លន់ សុផាត សូមចូលរួមរំលែកនូវមរណទុក្ខដ៏សែនសោកសង្រេងប្រកបដោយក្តីសោកស្តាយ និងសូមបួងសួងឧទ្ទិសដល់គុណបុណ្យព្រះរតនត្រ័យ ជួយដល់ដួងវិញ្ញាណក្ខន្ធរបស់មហាឧបាសកពុទ្ធសាសនូបត្ថម្ភន៍ មាឃ ចន្ថា សូមឆាប់បានយោនយកកំណើតចាប់បដិសន្ធិក្នុងសុគតិភពកុំបីឃ្លៀងឃ្លាតឡើយ។

សូមជម្រាបថា មហាឧបាសកពុទ្ធសាសនូបត្ថម្ភន៍ មាឃ ចន្ថា បានទទួលមរណភាពកាលពីថ្ងៃសុក្រ ៨រោច ខែស្រាពណ៍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី៨ ខែកញ្ញា ឆ្នាំ២០២៣ វេលាម៉ោង ១៩:៥៨នាទី ក្នុងជន្មាយុ ៦៨ឆ្នាំ ដោយរោគាពាធ។

បច្ចុប្បន្ន សពមហាឧបាសកពុទ្ធសាសនូបត្ថម្ភន៍ មាឃ ចន្ថា ត្រូវបានប្រារព្ធពិធីធ្វើបុណ្យទៅតាមប្រពៃណី នៅគេហដ្ឋាន ឯកឧត្តម ឧត្តមសេនីយ៍ឯក សែម សុតាន់ ផ្ទះលេខ១៨៥ ផ្លូវ១៣៧ ក្រុម៣ ភូមិកាកាប សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ ៕