រដ្ឋមន្រ្តីក្រសួងបរិស្ថាន អនុញ្ញាតឱ្យតំណាងអង្គការក្រៅរដ្ឋាភិបាល ចំនួន ១០រូប ចូលជួបសម្តែងការគួរសម និងពិភាក្សាការងារក្នុងភាពជាដៃគូអភិវឌ្ឍន៍

ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នៅថ្ងៃអង្គារ ទី១៣ ខែកញ្ញា ឆ្នាំ២០២៣ បានអនុញ្ញាតឱ្យតំណាងអង្គការក្រៅរដ្ឋាភិបាល ចំនួន ១០រូប ចូលជួបសម្តែងការគួរសម និងពិភាក្សាការងារក្នុងភាពជាដៃគូអភិវឌ្ឍន៍ នៅទីស្តីការក្រសួង។

ក្នុងជំនួបសម្តែងការគួរសម ឯកឧត្តមរដ្ឋមន្រ្តីបានថ្លែងឡើង នូវយុទ្ធសាស្រ្តជាអាទិភាពរបស់ក្រសួងបរិស្ថានសម្រាប់ដំណាក់កាលទី១នេះ ដែលផ្តោតលើ ការកាត់បន្ថយប្លាស្ទិក ការដាំដើមឈើ ជំរុញឱ្យមានអេកូទេសចរណ៍ សហគមន៍អព្យាក្រឹតកាបូន និងការប្រែប្រួលអាកាសធាតុ ដើម្បីផ្តល់ភាពងាយស្រួលដល់កិច្ចសហការ ជាមួយអង្គការសង្គមស៊ីវិល ដែលកំពុងអនុវត្តគម្រោងសកម្មភាព ហើយក្រសួងបរិស្ថានបើកទ្វាស្វាគមន៍រាល់កិច្ចសហការទាំងឡាយណា ដែលជួយលើកកម្ពស់ជីវភាពដល់ប្រជាពលរដ្ឋកម្ពុជា ជាពិសេសប្រជាពលរដ្ឋនៅតាមតំបន់ជនបទដាច់ស្រយាល។

ឆ្លើយតបក្នុងកិច្ចសហការភាពជាដៃគូអភិវឌ្ឍន៍ លោក សេង តៀក នាយកប្រតិបត្តអង្គការ WWF និងជាតំណាងអង្គការទាំង១០នៃជំនួបនេះ បានលើកឡើងថា អង្គការសង្គមស៊ីវិលពិតជាមានមោទនភាព ក្នុងការចូលរួមជាមួយយុទ្ធសាស្រ្តអាទិភាពរបស់ក្រសួងបរិស្ថាន ក្នុងការកាត់បន្ថយសកម្មភាពរបស់មនុស្សមួយចំនួន ដែលបានគំរាមគំហែងដល់បរិស្ថានរបស់យើងដូចជា ការកាប់បំផ្លាញព្រៃឈើ ការដាក់អន្ទាក់សត្វជាដើម។

គួររម្លឹកជូនដែរថា តំណាងអង្គការចំនួន១០ ដែលរួមមានអង្គការ WWF, WCS, FFI, តំណាងអង្គការ អភិរក្សអន្តរជាតិ CI, ACCB, MJP, WEA, Nature Life , FCEE, IUCN កម្ពុជា និងអវត្តមានតំណាង គម្រោងមរតកបៃតងនៃអង្គការ USAID ៕