ប៉ះចំថ្ងៃស៊យ បានទឹកហើយ នៅឡើយតែសាច់ ទីបំផុតទឹកក៏អស់ សាច់ក៏អត់ ខ្នោះក៏ជាប់ទៀត!
ភ្នំពេញ៖ ស្របតាមបទបញ្ជាដ៏ហ្មឹងម៉ាត់របស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង ដាក់ចេញដល់គ្រប់អង្គភាព ការិយាល័យជំនាញ និងអធិការដ្ឋាននគរបាលក្រុង ស្រុករួចមក និងដោយមានការណែនាំបន្ថែមពីលោកឧត្តមសេនីយ៍ត្រី លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ បទបញ្ជានេះត្រូវបានគ្រប់អង្គភាពពាក់ព័ន្ធយកទៅប្រតិបត្តិឱ្យដូចជាភ្លៀងរលឹម ដែលក្នុងនោះការប្រើប្រាស់វិធានការល្បាតក្នុងភូមិសាស្រ្តទទួលខុសត្រូវរបស់ខ្លួនគឺជាវិធានការបង្កាក្នុងចំណោមវិធានការផ្សេងទៀតរបស់នគរបាល។
ជាក់ស្តែង នារាត្រីថ្ងៃទី១២ ខែកញ្ញា ឆ្នាំ២០២៣ វេលាម៉ោង ០២និង៣០នាទីរំលងអធ្រាត្រទៅហើយ ក្នុងខណៈដែលកម្លាំង ល្បាតដឹកនាំដោយលោកវរសេនីយ៍ទោ ហុត តុងហូ អធិការនគរបាលស្រុកសង្កែ ទៅដល់ចំណុចភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង ក៏ស្រាប់តែជួបប្រទះនឹងបុរសចំនួន០២នាក់ កំពុងលេចចេញនូវវត្តមាននាកណ្តាលរាត្រីដ៏ស្ងប់ស្ងាត់នេះ ។ មិនបង្អង់យូរសមត្ថកិច្ចនគរបាលបានកាក់ដំណើររបស់គាត់និងផ្តើមធ្វើការសាកសួរ ខណៈដែលរូបគាត់មានភ្ជាប់នូវជាមួយស្រាបៀរចំនួន៤៣កំប៉ុង និងម៉ូទ័រស្វានចំនួន ០១ រួមនឹងកង់មួយគ្រឿងជាមធ្យោបាយផង។
ពេលសាកសួរបានដឹងថា រូបគេមានឈ្មោះ ងាត់ ខួច ភេទប្រុស អាយុ—-ឆ្នាំ មានទីលំនៅភូមិ ព្រែកមហាទេព សង្កាត់ស្វាយប៉ោក្រុងបាត់ដំបង ខេត្តបាត់ដំបង និងឈ្មោះ ឡុង សំណាង ភេទប្រុស អាយុ៣០ ឆ្នាំ មានទីលំនៅ ភូមិវត្តរំដួល សង្កាត់ចំការសំរោង ក្រុងបាត់ដំបង ខេត្តបាត់ដំបង ហើយគេបានឆ្លើយសារភាពថា ខ្លួនគេបានធ្វើសកម្មភាពលួចយកស្រារបៀរ ហ្គេនស្បើត ចំនួន៤៣ កំប៉ុង និង ម៉ូទ័រស្វាន ចំនួន០១ នារាត្រីនេះនៅចំណុចតារាងបាល់ទះមួយកន្លែងស្ថិតនៅ ភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង ។
ករណីខាងលើនេះប្រសិនបើគ្មានកិច្ចខិតខំប្រឹងប្រែងរបស់សមត្ថកិច្ចនគរបាលក្នុងការល្បាតរក្សាសន្តិសុខសណ្តា ប់ធ្នាប់សង្គមក្នុងមូលដ្ឋានជូនប្រជាពលរដ្ឋនោះទេ ម្លេះស្ថានភាពអសន្តិសុខនឹងលេចចេញជារូបភាពនិងបង្កនូវក្តីបារម្ភ ពីប្រជាពលរដ្ឋជាក់ជាមិនខាន ។
ពេលនេះប៉ះចំថ្ងៃស៊យហើយលោកចោរ ទឹកក៏អស់ សាច់ក៏អត់ ព្រោះអ្នកទាំងពីរត្រូវបានសមត្ថកិច្ចឃាត់ខ្លួនអនុវត្តតាមច្បាប់ ហើយពេលនេះកំពុងស្វែងរកម្ចាស់ស្រាបៀរនិងម៉ូទ័រស្វានដែលបានបាត់បង់ដោយស្នាដៃជនសង័្សយ ខាងលើដើម្បីប្រគល់ជូនគាត់វិញ៕
