នាយករដ្ឋមន្ត្រី ឲ្យរដ្ឋមន្ត្រីក្រសួងរ៉ែ ពិនិត្យលទ្ធភាពបញ្ចុះតម្លៃភ្លើង ក្នុងកម្រិតណាមួយ ខណៈសហគ្រាសជាង ២ម៉ឺន អាចទទួលប្រយោជន៍ ពីការបញ្ចុះតម្លៃនេះ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានឱ្យឯកឧត្ដម កែវ រតនៈ រដ្ឋមន្ត្រីក្រសួងរ៉ែ និងថាមពល ពិនិត្យលទ្ធភាពក្នុងការបញ្ចុះតម្លៃភ្លើង ក្នុងកម្រិតណាមួយសម្រាប់ឱ្យសហគ្រាស និងសិប្បកម្មនៅកម្ពុជា អាចបង្កើនការផលិតបន្ថែមទៀត ។ សម្ដេចថា អាចមានសហគ្រាសជាង ២ម៉ឺន ទទួលបានផលប្រយោជន៍ ពីការបញ្ចុះតម្លៃនេះ ។

ក្នុងពិធីសំណេះសំណាលជាមួយកម្មករ និយោជិតចំនួន ១៨ ១០៤ នាក់ នៅស្រុកបាទី ខេត្តតាកែវ នាថ្ងៃទី១៩ កញ្ញា សម្ដេចធិបតី ហ៊ុន ម៉ាណែត ថ្លែងថា «ខ្ញុំបានឱ្យឯកឧត្តម កែវ រតនៈ ពិនិត្យមើលតម្លៃអគ្គិសនី តើអាចបញ្ចុះក្នុងកម្រិតណាមួយ ពិសេសទៅលើវិស័យសហគ្រាសធុនតូច និងមធ្យម និងសិប្បកម្ម ឬរោងចក្រ ព្រោះនៅពេលដែលតម្លៃអគ្គិសនី ថោកគាត់នឹងបង្កើនការផលិតថែមទៀត» ។

សម្តេចធិបតីនាយករដ្ឋមន្រ្ដី បានជំរុញឱ្យឯកឧត្ដមរដ្ឋមន្រ្តី កែវ រតនៈ កុំចាំបាច់អនុវត្តន៍ថ្ងៃក្រោយ គឺចាប់ផ្ដើមអនុវត្តន៍ភ្លាម ចាប់ពីពេលនេះតទៅ ៕