នាយឧត្តមសេនីយ៍ ស ថេត អនុញ្ញាតឱ្យ នាយកប្រតិបត្តិក្រុមហ៊ុន E Security Service ចូលជួបសម្តែងការគួរសម

ភ្នំពេញ៖ ឯកឧត្ដម នាយឧត្តមសេនីយ៍ ស ថេត អគ្គស្នងការនគរបាលជាតិ នារសៀលថ្ងៃពុធ ទី២៧ ខែកញ្ញា ឆ្នាំ២០២៣ បានអនុញ្ញាតឱ្យ លោក Takeharu Mizukoshi នាយកប្រតិបត្តិក្រុមហ៊ុន E Security Service ចូលជួបសម្តែងការគួរសម និងអបអរសាទរចំពោះ ឯកឧត្តម ដែលត្រូវបានព្រះមហាក្សត្រ នៃព្រះរាជាណាចក្រកម្ពុជា ត្រាស់បង្គាប់តែងតាំងជា អគ្គស្នងការនគរបាលជាតិ។

លោក Takeharu Mizukoshi បានបញ្ចាក់ជូន ឯកឧត្ដម នាយឧត្តមសេនីយ៍ ស ថេត អគ្គស្នងការនគរបាលជាតិ អំពីការផ្ដេជ្ញាចិត្តបន្តកិច្ចសហប្រតិបត្តិការជួយជ្រោមជ្រែងគ្នាទៅវិញទៅមក រវាងក្រុមហ៊ុន E Security Service ដែលជាក្រុមហ៊ុនវិនិយោគលើឧបករណ៍ សម្ភារៈបច្ចេកទេសទំនើបបម្រើឱ្យកិច្ចសហកិច្ចប្រតិបត្តិការ បង្ការទប់ស្កាត់បទល្មើស និងថែរក្សាសន្តិសុខសង្គម។

ជាមួយគ្នានេះដែរ លោកនាយកប្រតិបត្តិក្រុមហ៊ុន E Security Service ក៏បានគោរពថ្លែងអំណរគុណដល់ ថ្នាក់ដឹកនាំអគ្គស្នងការដ្ឋាននគរបាលជាតិគ្រប់លំដាប់ថ្នាក់រួមមាន៖ ឯកឧត្តមសន្តិបណ្ឌិត នេត សាវឿន ជាពិសេសនោះគឺ ឯកឧត្ដម នាយឧត្តមសេនីយ៍ ស ថេត អគ្គស្នងការនគរបាលជាតិ ដែលបានថែរក្សា និងបន្តទំនាក់ទំនង ព្រមទាំងជួយជ្រោមជ្រែងក្រុមហ៊ុនស្របតាមអនុស្សារណៈ (MOU) យោគយល់គ្នារវាងក្រសួងមហាផ្ទៃ និងក្រុមហ៊ុន E Security Service។

ជាការឆ្លើយតប ឯកឧត្ដម នាយឧត្តមសេនីយ៍ ស ថេត បានមានប្រសាសន៍គាំទ្រទាំងស្រុងនូវក្រុមហ៊ុនវិនិយោគជប៉ុន ពិសេសវិនិយោគលើឧបករណ៍សម្ភារៈបច្ចេកទេស បម្រើឱ្យកិច្ចការពារសន្តិសុខ សណ្តាប់ធ្នាប់ និងបង្ការបទល្មើស។ ឯកឧត្តម ក៏បានលើកទឹកចិត្តឱ្យក្រុមហ៊ុនពង្រីកវិសាលភាពបំពាក់ឧបករណ៍សុវត្ថិភាពទាំងនេះ នៅគ្រប់គោលដៅសំខាន់ៗ ក៏ដូចជាគោលដៅអាទិភាពដែលមានមនុស្សចេញចូលច្រើន និងអគារខ្ពស់ៗ។

ឯកឧត្ដម នាយឧត្តមសេនីយ៍ ស ថេត បានបន្ថែមថា ជាងនេះទៅទៀត នៅតាមបណ្តាខេត្តសំខាន់ៗ ឯកឧត្តម ក៏បានលើកទឹកចិត្តឱ្យក្រុមហ៊ុនប្រឹងប្រែងពង្រីកទីផ្សាររបស់ខ្លួន កាន់តែទូលំទូលាយថែមទៀតដូចជា ខេត្តព្រះសីហនុ សៀមរាប និងខេត្តបាត់ដំបង។

ឆ្លៀតក្នុងឱកាសនោះ ឯកឧត្ដម នាយឧត្តមសេនីយ៍ ស ថេត អគ្គស្នងការនគរបាលជាតិ ក៏បានផ្តល់អនុសាសន៍ឱ្យក្រុមហ៊ុនផ្តល់ព័ត៌មានមកនគរបាលជាតិកម្ពុជាគ្រប់ពេលវេលា និងអនុវត្តនូវអ្វីដែលជាបទបញ្ញត្តិ ក៏ដូចជាការណែនាំរបស់នគរបាលជាតិកម្ពុជា លើកិច្ចសហការគ្នាលើការបង្ការ ទប់ស្កាត់បទល្មើស តាមរយៈព័ត៌មានដែលផ្តល់ឱ្យដោយទីបញ្ជាការក្រុមហ៊ុន E Security Service ៕