អភិបាលខេត្តកំពង់ធំ៖ សុខចិត្តបង្ហូរញើសនៅទីលានហ្វឹកហាត់ ប្រសើរជាងបង្ហូរឈាម នៅលើសមរភូមិប្រយុទ្ធ

ភ្នំពេញ៖ ឯកឧត្តម ងួន រតនៈ អភិបាលខេត្តកំពង់ធំ បានថ្លែងថា សុខចិត្តបង្ហូរញើសនៅទីលានហ្វឹកហាត់ ប្រសើរជាងបង្ហូរឈាមនៅលើសមរភូមិប្រយុទ្ធ។ ប្រសាសន៍ដ៏មានអត្ថន័យនេះ ត្រូវបានលើកឡើងក្នុងពិធីបាញ់គ្រាប់ពិតនៃកម្មវិធីហ្វឹកហ្វឺនរបស់មេបញ្ជាការតំបន់ប្រតិបត្តិការសឹករងកំពង់ធំ នៅបញ្ជាការដ្ឋានយុទ្ធភូមិភាគ ៤ នៅស្រុកប្រាសាទបល្ល័ង្ក ខេត្តកំពង់ធំ នាព្រឹកថ្ងៃទី២៨ ខែកញ្ញា ឆ្នាំ២០២៣។

ជាមួយគ្នានោះដែរ ឯកឧត្តម ងួន រតនៈ សូមកោតសរសើរដោយស្មោះដល់មេបញ្ជាការមេបញ្ជាការរងដែលបានអនុវត្តយ៉ាងជួបជួននូវតួនាទី ភារកិច្ចតាមបទបញ្ជារបស់អគ្គបញ្ជាការកងយុទ្ធពលខេមរភូមិន្ទ ក៏ដូចជាបញ្ជារបស់បញ្ជាការដ្ឋានយុទ្ធភូមិភាគ៤ ដែលបានដាក់ចូលផែនការប្រចាំឆ្នាំទាក់ទងទៅនឹងការហ្វឹកហាត់ជាប្រចាំទៅដល់កងកម្លាំងប្រដាប់អាវុធ។

ឯកឧត្តម អភិបាលខេត្តកំពង់ធំ បន្ថែមទៀតថា នេះជាកិច្ចការដែលមានសារៈសំខាន់ណាស់សម្រាប់កងយុទ្ធពលខេមរភូមិន្ទ ក្នុងការបង្កើននូវសមត្ថភាព ជំនាញពិតប្រាកដ ដល់កម្លាំងសម្រាប់ការពារប្រទេសជាតិ បើទោះបីប្រទេសយើងធ្លាប់ឆ្លងកាត់សង្គ្រាម ហើយសព្វថ្ងៃនេះ ទទួលបានសុខសន្តិភាពក៏ដោយ ប៉ុន្តែកងទ័ពមិនត្រូវបោះបង់ និងភ្លេចខ្លួននោះទេ ត្រូវតែហ្វឹកហាត់ បង្កើនសមត្ថភាព ចំណេះ ជំនាញ និងអង្គអាចក្លាហានជានិច្ច។

ឯកឧត្តម អភិបាលខេត្តកំពង់ធំ បន្តទៀតថា ទោះបីយើងមានការហ្វឹកហាត់ជាបន្តបន្ទាប់ក្តី ទាក់ទងនឹងសមត្ថភាពនៅមានកម្រិត ដោយសារការហ្វឹកហាត់នេះ មានរយៈពេលខ្លី ត្រឹមតែបីខែប៉ុណ្ណោះ។ ដូនេះ ជំនាញនៅក្នុងមេរៀន មានការអនុវត្តជាក់ស្ដែង យើងទទួលបានលទ្ធផលមានកម្រិត ទោះយ៉ាងណាការយល់ដឹងទទួលបានលទ្ធផលល្អ។

លើសពីនេះទៀត ឯកឧត្តម ងួន រតនៈ សូមកោតសរសើរដល់លោកមេបញ្ជាការតំបន់ប្រតិបត្តិការសឹករងកំពង់ធំ ក្រៅពីការងារស្នូល និងការងារជំនាញ លោកមេបញ្ជាការ បានដឹកនាំកងកម្លាំងធ្វើការងារសង្គមជាច្រើន ជាពិសេសការងារមនុស្សធម៌ ផ្សារភ្ជាប់ជាមួយនឹងប្រជាពលរដ្ឋ ៕