ឯកឧត្តមរដ្ឋមន្រ្តី ហេង សួរ ណែនាំដល់មន្ត្រីក្រោមឱវាទ បន្តកិច្ចខិតខំប្រឹងប្រែង បំពេញការងារតាមផ្នែកទទួលបន្ទុករៀងៗខ្លួន ប្រកបដោយស្មារតី “ទន់ភ្លន់ តែម៉ឹងម៉ាត់ និងច្បាស់លាស់”
ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃសុក្រ ទី២៩ ខែកញ្ញា ឆ្នាំ២០២៣ បានអញ្ជើញដឹកនាំកិច្ចប្រជុំប្រចាំសប្តាហ៍ទី៤ សម្រាប់ខែកញ្ញា ឆ្នាំ២០២៣ ជាមួយថ្នាក់ដឹកនាំរបស់ក្រសួង ដើម្បីពិនិត្យតាមដានវឌ្ឍនភាពការងារ និងដោះស្រាយបញ្ហាប្រឈមនានា ព្រមទាំងផ្តល់អនុសាសន៍ណែនាំលើកិច្ចការជាអាទិភាពនៃក្រសួងការងារ និងបណ្តុះបណ្តាលវិជ្ជាជីវៈ។
ថ្លែងនៅក្នុងកិច្ចប្រជុំ ឯកឧត្តមរដ្ឋមន្ត្រីបានសម្តែងនូវអំណរសាទរជាថ្មីនូវការសម្រេចបានលទ្ធផលដ៏ប្រពៃមួយក្នុងចំណោមភារកិច្ចអាទិភាពទាំង៦ ដែលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ឱ្យក្រសួងការងារ និងបណ្តុះបណ្តាលវិជ្ជាជីវៈសម្រេចឱ្យបាន ពោលគឺការដំឡើងប្រាក់ឈ្នួលអប្បបរមាជូនដល់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប ដែលបានកើនដល់២០៤ដុល្លារអាមេរិកក្នុងមួយខែ ហើយនឹងចាប់ផ្ដើមអនុវត្តពីថ្ងៃទី១ ខែមករា ឆ្នាំ២០២៤ខាងមុខតទៅ។
ឯកឧត្តមរដ្ឋមន្ត្រីបានបញ្ជាក់បន្តថា សមិទ្ធផលដ៏រីករាយនេះជាកិច្ចខិតខំប្រឹងប្រែងដ៏ស្វិតស្វាញរបស់ថ្នាក់ដឹកនាំនៃក្រសួង ជាពិសេសក្រុមប្រឹក្សាជាតិប្រាក់ឈ្នួលអប្បបរមា ក្រោមការចង្អុលបង្ហាញរបស់រាជរដ្ឋាភិបាលកម្ពុជា ដែលតែងតែគិតគូរក្នុងការបង្កើនប្រាក់ចំណូលជូនដល់កម្មករនិយោជិត ស្របពេលបង្កើនឱកាសទាក់ទាញអ្នកវិនិយោគថ្មីមកកាន់កម្ពុជា ដើម្បីបង្កើនការងារថ្មីជូនប្រជាជនកម្ពុជា។
ជាមួយគ្នានេះ ឯកឧត្តមរដ្ឋមន្ត្រីបានផ្តល់អនុសាសន៍ណែនាំដល់មន្ត្រីគ្រប់លំដាប់ថ្នាក់នៅក្នុងក្រសួង បន្តកិច្ចខិតខំប្រឹងប្រែង បំពេញការងារតាមផ្នែកទទួលបន្ទុករៀងៗខ្លួន ក្នុងការពង្រឹង និងពង្រីកគុណភាពការងារ និងការដឹកនាំ ប្រកបដោយស្មារតី “ទន់ភ្លន់ តែម៉ឹងម៉ាត់ និងច្បាស់លាស់” ធ្វើយ៉ាងណាធានាដំណើរការការងារ និងការផ្តល់សេវាពាក់ព័ន្ធជូនប្រជាជនគ្រប់ៗរូប សំដៅសម្រេចឱ្យបានដើម្បីរួមចំណែកនៃការអនុវត្ត “យុទ្ធសាស្ត្របញ្ចកោណដំណាក់កាលទី១” ដើម្បីកំណើនការងារ សមធម៌ ប្រសិទ្ធភាព និងចីរភាព ដើម្បីកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ៕
