ឯកឧត្តម ចាន់ អ៊ាន ដឹកនាំប្រជុំពិនិត្យលើសេចក្ដីព្រាងប្រកាសស្ដីពីការរៀបចំតួនាទី ភារកិច្ច រចនាសម្ព័ន្ធ និងរបៀបរបបការងារការិយាល័យចំណុះនាយកដ្ឋាន នៃអគ្គនាយកដ្ឋានធនធានមនុស្ស

ភ្នំពេញ៖ ឯកឧត្តមសន្ដិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ នាថ្ងៃចន្ទ ទី២ ខែតុលា ឆ្នាំ២០២៣នេះ បានអញ្ជើញជាអធិបតីដឹកនាំកិច្ចប្រជុំពិនិត្យ និងផ្ដល់យោបល់លើសេចក្ដីព្រាងប្រកាសស្ដីពី ការរៀបចំតួនាទី ភារកិច្ច និងរចនាសម្ព័ន្ធ និងរបៀបរបបធ្វើការងាររបស់ការិយាល័យចំណុះឲ្យនាយកដ្ឋាន នៃអគ្គនាយកដ្ឋានធនធានមនុស្ស ក្រសួងមហាផ្ទៃ ដោយមានការអញ្ជើញចូលរួមពី ឯកឧត្តមរដ្ឋលេខាធិការ អនុរដ្ឋលេខាធិការ អគ្គស្នងការនគរបាលជាតិ អគ្គលេខាធិការ ប្រធានក្រុមប្រឹក្សានីតិកម្ម អគ្គនាយក ថ្នាក់ដឹកនាំ និងមន្ត្រីពាក់ព័ន្ធជាច្រើនរូបទៀត។

ឯកឧត្តមសន្ដិបណ្ឌិត ចាន់ អ៊ាន បានលើកឡើងថា ដោយទទួលបានការអនុញ្ញាតដ៏ខ្ពង់ខ្ពស់របស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កិច្ចប្រជុំនៅថ្ងៃនេះនឹងធ្វើការពិភាក្សា និងផ្ដល់យោបល់លើសេចក្ដីព្រាងប្រកាស ស្ដីពី ការរៀបចំតួនាទី ភារកិច្ច និងរចនាសម្ព័ន្ធ និងរបៀបរបបធ្វើការងាររបស់ការិយាល័យចំណុះនាយកដ្ឋាន នៃអគ្គនាយកដ្ឋានធនធានមនុស្ស ក្រសួងមហាផ្ទៃ ដើម្បីអនុញ្ញាតអង្គប្រជុំចូលរួមផ្ដល់នូវធាតុចូលនានាក្នុងការចូលរួមកែសម្រួលសេចក្ដីព្រាងប្រកាសនេះ ៕