នាយករដ្ឋមន្ត្រី អំពាវនាវយ៉ាងទទូចដល់ម្ចាស់ផ្ទះជួល បន្ទប់ជួល កុំឲ្យដំឡើងថ្លៃ នៅឆ្នាំ២០២៤
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវយ៉ាងទទួចដល់ម្ចាស់ផ្ទះជួល ម្ចាស់បន្ទប់ជួល កុំឲ្យដំឡើងថ្លៃឈ្នួល នៅក្នុងឆ្នាំ២០២៤ ។
ក្នុងឱកាសចុះជួបសំណេះសំណាល ជាមួយកម្មករនិយោជិតចំនួន ១៨,០៩៩នាក់ នាថ្ងៃទី៣ ខែតុលា ឆ្នាំ២០២៣ សម្តេចធិបតី ហ៊ុន ម៉ាណែត បានមានប្រសាសន៍ថា ការដំឡើងប្រាក់ខែត្រឹម ៤ដុល្លារ គឺដើម្បីចែកគ្នារស់ក្នុងពេលគ្រាលំបាក ទោះបីក្នុងចំនួនតិចឬច្រើន គឺជាស្មារតីរួម ចែកគ្នារស់ ជួយគ្នារស់ ហើយមានឱកាសពង្រីកទីផ្សារបន្ថែមទៀត រក្សាការងារដែលមានស្រាប់ ព្រមទាំងទាក់ទាញអ្នកវិនិយោគថ្មីមកបណ្ដាក់ទុននៅកម្ពុជាឱ្យកាន់តែច្រើនថែមទៀត។
សម្ដេចធិបតី បានអំពាវនាវដល់ម្ចាស់ផ្ទះជួល ម្ចាស់បន្ទប់ជួលក្ដីសូមកុំដំឡើងថ្លៃផ្ទះជួល និងបន្ទប់ជួលនៅក្នុងឆ្នាំ២០២៤។ ទោះបីម្ចាស់ផ្ទះជួល ម្ចាស់បន្ទប់ជួលមានការលំបាក តែស្ថានភាពកម្មករនិយោជិតមានការលំបាកជាង ដូច្នេះសូមមានការយោគយល់ទាំងអស់គ្នាក្នុងស្ថានភាពលំបាកនេះ។
សម្ដេចធិបតី ហ៊ុន ម៉ាណែត ថែមទាំងបានណែនាំដល់រដ្ឋាករទឹក និងអគ្គិសនីកម្ពុជាត្រូវបញ្ចុះថ្លៃទឹក និងថ្លៃភ្លើងដល់កម្មករនិយោជិតដែលកំពុងស្នាក់នៅតាមផ្ទះជួល និងដើម្បីជាការគិតគូរដល់ម្ចាស់ផ្ទះជួលផងដែរ។
សូមរំលឹកថា កាលពីថ្ងៃទី២៨ ខែកញ្ញា ឆ្នាំ២០២៣កន្លងទៅ ក្រុមប្រឹក្សាជាតិប្រាក់ឈ្នួលអប្បបរមាបានសម្រេចនូវការពិភាក្សាដំឡើងប្រាក់ឈ្នួលអប្បបរមាចំនួន២០៤ដុល្លារ ជូនកម្មករនិយោជិតក្នុងវិស័យវាយនភណ្ឌ កាត់ដេរ ស្បែកជើង និងផលិតផលិតធ្វើដំណើរនិងកាបូប ដោយចាប់អនុវត្តពីខែមករា ឆ្នាំ២០២៤ខាងមុខ រួមជាមួយប្រាក់អត្ថប្រយោជន៍ផ្សេងៗទៀតរក្សាទុកនៅដដែល។
គួរឲ្យដឹងថា នៅតាមតំបន់ដែលមានបន្ទប់ជួល តម្លៃប្រើប្រាស់អគ្គិសនីត្រឹម៤០០-៦០០រៀលប៉ុណ្ណោះក្នុង១គីឡូវ៉ាត់ម៉ោង ទាបជាងតម្លៃពីមុនដែលមានរហូតដល់២,០០០រៀលក្នុង១គីឡូវ៉ាត់ម៉ោង។ រីឯតម្លៃទឹកបានចុះមកត្រឹម៨០០រៀលក្នុង១ម៉ែត្រគូប ទាបជាងតម្លៃពីមុនដែលមានរហូតដល់២,៥០០រៀលក្នុង១ម៉ែត្រគូប ៕
