នាយករដ្ឋមន្ត្រី ហ៊ុន ម៉ាណែត ប្រកាសបន្តមិនយកពន្ធ លើអ្វីដែលរដ្ឋមិនធ្លាប់យក

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសប្តេជ្ញាចិត្តថាមិនបង្កើតពន្ធថ្មី និងបន្តមិនយកពន្ធលើអ្វី ដែលមិនធ្លាប់យកពន្ធពីមុនៗមកនោះទេ ។

ក្នុងឱកាសបន្តចុះជួបកម្មករជិត ២ម៉ឺននាក់ នាថ្ងៃទី៣ ខែតុលា ឆ្នាំ២០២៣ សម្តេចធិបតី ហ៊ុន ម៉ាណែត បញ្ជាក់ថា «ខ្ញុំសុំបញ្ជាក់ជូនបងប្អូនប្រជាពលរដ្ឋ នូវការប្តេជ្ញាចិត្ត និងគោលនយោបាយបន្តទៀត របស់គណបក្សប្រជាជន ទៅលើការមិនយកពន្ធ ទី១ យើងនឹងបន្តមិនយកពន្ធលើដីកសិកម្ម ដីស្រែជាលក្ខណៈគ្រួសារ របស់ប្រជាពលរដ្ឋទេ ទី២ យើងមិនយកពន្ធលើសម្ភារកសិកម្មទេ ទី៣ យើងមិនយកពន្ធ លើកសិផលកសិកម្មទេ ។ យើងមិនយកពន្ធអចលនទ្រព្យ ដែលមានតម្លៃថោកជាង ១០០លានរៀល ឬ២ ៥០០០ដុល្លារទេ អីចឹងបងប្អូនទិញផ្ទះថោកជាងនេះ មិនជាប់ពន្ធទេ ហើយពន្ធប្រថាប់ត្រា បើមានការទិញលក់អចលនទ្រព្យ ក្រោម៧ម៉ឺនដុល្លារ មិនយកពន្ធទេ ។ យើងបន្តមិនយកពន្ធនេះ ហើយពន្ធប្រថាប់ត្រា ដោយការផ្ទេរទ្រព្យ ពីឪពុកម្តាយមកកូន ពីយាយតាមកកូនចៅ ប្តីមកប្រពន្ធ សម្រាប់អំណោយមួយលើក ឬមរតកនោះ យើងនឹងបន្តមិនយកពន្ធទេ ពន្ធផ្លូវទោចក្រយានយន្តដែលជាម៉ូតូ ឬកង់បី រដ្ឋក៏មិនយកពន្ធដែរ នេះហើយក្រៅពីមិនបង្កើតពន្ធថ្មី រដ្ឋក៏បន្តប្តេជ្ញាចិត្តមិនយក នូវអ្វីដែលយើងមិនបានយកដែរ សូមឱ្យច្បាស់រឿងពន្ធនេះ»។

សម្តេចបញ្ជាក់បន្ថែមថា «ការលុបបំបាត់ភាស៊ី ការបង់ភាស៊ីថ្លៃផ្សេងៗ ចំពោះការលក់ដូររបស់ប្រជាពលរដ្ឋ តាមកញ្ច្រែង កញ្ជើ ល្អី នៅតាមផ្សារនានាទូទាំងប្រទេស រដ្ឋបន្តមិនយកភាស៊ីនេះទេ។ កន្លងទៅមានការជ្រួលច្របល់ នៅផ្សារខ្លះបារម្ភពីរឿងយកភាស៊ីតាម កញ្ជើ ល្អី កញ្ច្រែង អត់ទេ រដ្ឋគ្មានគោលនយោបាយយកទេ អាជ្ញាធរគ្រប់ជាន់ថ្នាក់ត្រូវមើលប្រយ័ត្នមានគេទៅយក គឺខុសហើយ» ៕