អ្នកជំនាញ៖ កិច្ចព្រមព្រៀងពាណិជ្ជកម្មសេរី RCEP ជួយកម្ពុជាធ្វើពិពិធកម្មសេដ្ឋកិច្ច និងការនាំចេញ

ភ្នំពេញ៖ សេដ្ឋវិទូជាន់ខ្ពស់របស់ធនាគារពិភពលោក បាននិយាយកាលពីថ្ងៃចន្ទថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ដែលបានចូលជាធរមានកាលពីឆ្នាំ២០២២ បានជួយធ្វើពិពិធកម្មសេដ្ឋកិច្ច និងការនាំចេញរបស់ប្រទេសកម្ពុជា។

ការអះអាងស្រដៀងគ្នារបស់អ្នកជំនាញជាតិ និងអន្តរជាតិទាំងពីរ ធ្វើឡើងក្រោយពេលធនាគារពិភពលោក ទើបបានបញ្ចេញរបាយការណ៍ទស្សនវិស័យសេដ្ឋកិច្ចកម្ពុជា នៅរក្សាកំណើន៥,៥ភាគសម្រាប់ឆ្នាំ២០២៣ និងមានដល់៦,១ភាគរយនៅឆ្នាំ២០២៤។

ជាការកត់សម្គាល់ គឺប្រទេសជាច្រើនទៀតក្នុងតំបន់សុទ្ធតែត្រូវបាន World Bank ទម្លាក់ការព្យាករលើកលែងតែកម្ពុជា។ លោក អាឌីយ៉ា ម៉ាធូ (Aaditya Mattoo) ប្រធានសេដ្ឋវិទូនៃតំបន់អាស៊ីបូព៌ា និងប៉ាស៊ីហ្វិករបស់ធនាគារពិភពលោកបាននិយាយថា កិច្ចព្រមព្រៀង RCEP និងច្បាប់វិនិយោគថ្មីៗរបស់កម្ពុជា បានអនុញ្ញាឱ្យមានលទ្ធភាព ​និងបើកទីផ្សារកាន់តែច្រើន ជួយបង្កើតលំហូរពាណិជ្ជកម្ម និងការវិនិយោគថ្មីៗ។

លោកបន្តថា វានឹងជួយកម្ពុជាក្នុងការធ្វើពិពិធកម្មសេដ្ឋកិច្ច និងការនាំចេញរបស់ខ្លួន ជំនួសឱ្យការពឹងផ្អែកខ្លាំងលើការនាំចេញសម្លៀកបំពាក់ និងផលិតផលធ្វើដំណើរ។ ទោះយ៉ាងណា អ្នកជំនាញរូបនេះ បានស្នើឱ្យកម្ពុជាធ្វើឱ្យប្រសើរឡើងនូវកម្លាំងពលកម្មជំនាញ និងការតភ្ជាប់ហេដ្ឋារចនាសម្ព័ន្ធរបស់ខ្លួន ដើម្បីទ្រទ្រង់សេដ្ឋកិច្ច និងការនាំចេញធានាបានសម្រាប់រយៈពេលយូរ។

នៅក្នុងរបាយការណ៍ទស្សនវិស័យសេដ្ឋកិច្ចកម្ពុជាដដែល ធនាគារពិភពលោកបាននិយាយថា RCEP និងកិច្ចព្រមព្រៀងពាណិជ្ជកម្មសេរីផ្សេងទៀត ដែលបានផ្តល់សច្ចាប័នរួចហើយ បានជួយកម្ពុជាពង្រឹងការនាំចេញ និងទាក់ទាញការវិនិយោគផ្ទាល់ពីបរទេសបន្ថែមទៀត។ សូមជម្រាបថា កិច្ចព្រមព្រៀងពាណិជ្ជកម្មសេរី RCEP រួមមានសមាជិកប្រទេសនៅអាស៊ីប៉ាស៊ីហ្វិកចំនួន១៥ ក្នុងនោះសមាជិកអាស៊ានទាំង១០ដូចជា ប្រ៊ុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ វៀតណាម រួមនឹងប្រទេសចំនួនប្រាំទៀតដូចជា ចិន ជប៉ុន កូរ៉េខាងត្បូង អូស្ត្រាលី និងញូហ្សេលែន។ ការនាំចេញសរុបរបស់កម្ពុជា ទៅកាន់ប្រទេសសមាជិក RCEP មានតម្លៃជិត៤,៦ពាន់លានដុល្លារអាម៉េរិក រាប់ចាប់ពីខែមករា ដល់ខែកក្កដា ឆ្នាំ២០២៣។ ចំនួននេះកើនឡើង២១ភាគរយធៀបរយៈពេលដូចគ្នាកាលពីឆ្នាំ២០២២។ នេះបើយោងតាមរបាយការណ៍របស់ក្រសួងពាណិជ្ជកម្មកម្ពុជា។

ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្មលើកឡើងថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ហៅកាត់ថា RCEP គឺជាកម្លាំងចលករដ៏សំខាន់សម្រាប់កំណើនការនាំចេញរបស់កម្ពុជា និងជាមេដែកដើម្បីទាក់ទាញលំហូរវិនិយោគផ្ទាល់ពីក្រៅប្រទេសកាន់តែច្រើន។ កិច្ចព្រមព្រៀងពាណិជ្ជកម្មទាំងអស់ នឹងជួយកម្ពុជាឱ្យឆ្លងផុតពីស្ថានភាពប្រទេសអភិវឌ្ឍន៍តិចតួចនៅឆ្នាំ២០២៧ និងសម្រេចបាននូវគោលដៅក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២៣០ និងបន្តទៅយកបានប្រទេសមានចំណូលខ្ពស់នៅឆ្នាំ២០៥០។

គួរបញ្ជាក់ថា កិច្ចព្រមព្រៀង RCEP គ្របដណ្ដប់លើប្រជាជនចំនួនសរុប២,៣ពាន់លាននាក់ គិតជាទឹកប្រាក់ស្មើនឹង២៥,៨ពាន់ពាន់លានដុល្លារអាម៉េរិកនៃ GDP សកលលោក និងស្មើ១២,៧ពាន់ពាន់លានដុល្លារនៃពាណិជ្ជកម្មពិភពលោកលើទំនិញ និងសេវាកម្ម និងចុងក្រោយតំណាងឱ្យ៣១ភាគរយនៃលំហូរវិនិយោគផ្ទាល់សកល។ នេះបើតាមទិន្នន័យរបស់ធនាគារពិភពលោក៕