សម្រេចដំឡើងប្រាក់ឧបត្ថម្ភដល់គរុសិស្ស ដោយយកបៀវត្សសរុបគុណ៧០ភាគរយ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានសម្រេចដំឡើងប្រាក់ឧបត្ថម្ភដល់គរុសិស្ស ដែលបានប្រឡងជាប់ហើយកំពុងសិក្សា ដោយយកបៀវត្សសរុប គុណ៧០ភាគរយ ។
ក្នុងឱកាសអញ្ជើញជាធិបតីប្រារព្ធ ទិវាគ្រូបង្រៀនលើកទី២៦ នាថ្ងៃទី៥ តុលានេះ សម្ដេចធិបតី បញ្ជាក់ថា «គរុសិស្សកាំ (ក) កាលពីឆ្នាំ២០២៣ ទទួលបាន ៦ម៉ឺន៣ពាន់រៀល គុណនឹង៧០ភាគរយ ឥឡូវ (ឆ្នាំ២០២៤) នឹងឡើងទៅ ១លាន១សែន៧ម៉ឺនរៀល គរុសិស្សកាំ (ខ) ដែលចេញទៅបង្រៀងមូលដ្ឋាន កាលមុន ៧៥ម៉ឺន គុណនឹង៧៥ភាគេយ បានជាង៥៦ម៉ឺន ឥឡូវថ្មីនេះយើងគុណទៅ បាន១លាន១សែនជាង ហើយគ្រូទាបបំផុតគម្រិត (គ) កាលមុនបាន ៦៦ម៉ឺនគុណនឹង៨០ភាគរយ បាន៥៣ម៉ឺន ក្នុង១ខែ ឥឡូវយើងគុណនឹងបៀវត្សមូលដ្ឋាន បាន៩៨ម៉ឺន ជិត១លានរៀលដែរ នេះមិនមែនជាបៀវត្សទេ ជាអាហារូបករណ៍» ។
សម្ដេចធិបតី ហ៊ុន ម៉ាណែត បានមានប្រសាសន៍ថា គរុសិស្សខុសពីគេត្រង់ ពេលដែលប្រឡងជាប់ ចូលមកជាសិស្ស គឺយើងអត់គិតជាប្រាក់បៀវត្សទេ ។ សម្ដេចថា កាលពីមុនគរុសិស្ស ទទួលបានប្រាក់ឧបត្ថម្ភ ៤ម៉ឺនរៀល និងក្រោយមកទៀតឡើងដល់ ៨ម៉ឺនរៀល ហើយសម្ដេចតេជោ បានកែសម្រួលជាប្រចាំដើម្បីលើកកម្ពស់ ព្រោះគរុសិស្សមិនមែនជាមន្ត្រីរាជការទេ គឺជានិស្សិត ។
សម្ដេចធិបតីបន្តថា គរុនិស្សិតដែលរៀននៅវិទ្យាស្ថានគម្រិតឧត្ដម ទទួលបានជាង ៦០ម៉ឺនរៀល ចំណែកគ្រូមត្តេយ្យ គ្រូបឋមទទួលបាន ៥៣ម៉ឺនរៀល ដូច្នេះយើងកើនពី ៤ម៉ឺន ទៅ៨ម៉ឺន ទៅ៥០ម៉ឺនរៀល ។
សម្ដេចធិបតីនាយករដ្ឋមន្ត្រី បញ្ជាក់ថា «ខ្ញុំគិតថាការពង្រឹងនេះត្រូវគិតគូពីការវិនិយោគ លើធនធានមនុស្ស ល្ងាចមិញខ្ញុំគិតជាមួយខាងហិរញ្ញវត្ថុថា សម្រាប់លោកគ្រូអ្នកគ្រូ ដែលប្រឡងជាប់ជាគរុសិស្ស យើងកុំយកបៀវត្សមូលដ្ឋាន យើងយកបៀវត្សសរុបគុណនឹង ៧០ភាគរយតែម្ដង» ។
សម្ដេចបន្ថែមថា ការវិយោគពង្រឹង គឺត្រូវវិនិយោគទៅលើមនុស្ស ហើយត្រូវចាប់ផ្ដើមពីគ្រូដែលប្រឡងចូលតែម្ដង ។ សម្ដេចក៏បានប្រាប់ទៅលោកគ្រូអ្នកគ្រូមុនៗ កុំឲ្យច្រណែនអ្នកក្រោយ ហើយសម្ដេចថា នឹងបន្តធ្វើទៅតាមកម្រិតថវិកាដែលយើងមាន ៕
