អភិបាលខេត្តរតនគិរី ជម្រុញឲ្យមន្ត្រីមូលដ្ឋាន និងអាជ្ញាធរពាក់ព័ន្ធនានាខិតខំអនុវត្តការងារឲ្យមានប្រសិទ្ធភាពនិងតាមដានរាល់បញ្ហាសំណូមពរ របស់ប្រជាពលរដ្ឋឲ្យទាន់ពេលវេលា

ភ្នំពេញ៖ ឯកឧត្តម ញ៉ែម សំអឿន អភិបាលខេត្តរតនគិរី បានជម្រុញឲ្យមន្ត្រីមូលដ្ឋាន អាជ្ញាធរពាក់ព័ន្ធ និងមន្ទីរអង្គភាពនានាខិតខំអនុវត្តការងារឲ្យមានប្រសិទ្ធភាព និងតាមដានរាល់បញ្ហាសំណូមពរខ្វះខាតរបស់បងប្អូនប្រជាពលរដ្ឋធ្វើយ៉ាងណាឆ្លើយតបជូនគាត់បានទាន់ពេលវេលា។

ការជ្រុញរបស់ឯកឧត្តម ញ៉ែម សំអឿន អភិបាលខេត្ត បែបនេះធ្វើឡើងនៅព្រឹកថ្ងៃទី៩ ខែតុលា ឆ្នាំ២០២៣ ក្នុងឱកាសដែលឯកឧត្តម បានអញ្ជើញជាអធិបតីកិច្ចក្នុងប្រជុំសាមញ្ញលើកទី៥២ របស់ក្រុមប្រឹក្សាខេត្តរតនគិរី។

ឯកឧត្តមអភិបាលខេត្ត បានបន្តទៀតថា អជ្ញាធរមូលដ្ឋានគ្រប់ជាន់ថ្នាក់ត្រូវតាមដាននិងក្តាប់ឲ្យបានសកម្មភាពទាំងឡាយ ជាពិសេសការអនុវត្តឲ្យបាននូវភូមិ ឃុំ មានសុវត្ថិភាព ឲ្យបានល្អប្រសើជូនបងប្អូនប្រជាពលរដ្ឋនៅតាមមូលដ្ឋាន។ កងកម្លាំង អាជ្ញាធរពាក់ព័ន្ធត្រូវយកចិត្តទុកដាក់អនុវត្តបង្ក្រាប នៅបញ្ហាគ្រឿងញៀននៅតាមមូលដ្ឋានឲ្យមានប្រសិទ្ធភាពខ្ពស់។

ក្នុងឱកាសនេះផងដែរ ឯកឧត្តម សុខ ហម សមាជិកក្រុមប្រឹក្សាខេត្ត តំណាងឯកឧត្តម ណាប់ ប៊ុនហេង ប្រធានក្រុមប្រឹក្សាខេត្ត បានថ្លែងកោតសរសើរនិងវាយតម្លៃខ្ពស់ចំពោះការខិតខំប្រឹងប្រែងរបស់មន្ទីរអង្គភាពអាជ្ញាធរពាក់ព័ន្ធដែលបានខិតខំអនុវត្តន៍អស់ពីកម្លាំងកាយចិត្តក្នុងការបម្រើផលប្រយោជន៍ជូនបងប្អូនប្រជាពលរដ្ឋនៅតាមមូលដ្ឋានរបស់ខ្លួនបានយ៉ាងល្អប្រសើរនាពេលកន្លងមក។

សូមបញ្ជាក់ថា កិច្ចប្រជុំសាមញ្ញលើកទី៥២ របស់ក្រុមប្រឹក្សាខេត្តរតនគិរី មានរបៀបវារៈមួយចំនូនរួមមាន៖
-ពិនិត្យពិភាក្សា និងអនុម័ត សេចក្តីព្រាងកំណត់ហេតុកិច្ចប្រជុំសាមញ្ញ លើកទី៥១ របស់ក្រុមប្រឹក្សាខេត្ត។
-ពិនិត្យពិភាក្សា និងអនុម័ត សេចក្តីព្រាងរបាយការណ៍ស្តីពីការអនុវត្តការងាររបស់ រដ្ឋបាលខេត្ត ប្រចាំខែកញ្ញា និងលើកទិសដៅការងារ ប្រចាំខែតុលា ឆ្នាំ២០២៣។
-ពិនិត្យពិភាក្សា និងអនុម័ត សេចក្តីសម្រេចស្តីពីដំណើរការរៀបចំថវិកា ផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តឆ្នាំ២០២៣ ៕