ឯកឧត្តមកិត្តិនីតិកោសលបណ្ឌិត អុឹម ឈុនលឹម អញ្ជើញចូលរួមកាន់បិណ្ឌវេនទី១២ នៅវត្តសិរីសន្ធរវង្សក្រចេះក្រុង

ភ្នំពេញ៖ ឯកឧត្តមកិត្តិនិតិកោសលបណ្ឌិត អុឹម ឈុនលឹម ប្រធានក្រុមប្រឹក្សាធម្មនុញ្ញ និងលោកជំទាវ ឯកឧត្តម វ៉ា ថន អភិបាលខេត្តក្រចេះ និងថ្នាក់ដឹកនាំក្នុងខេត្ត នាព្រឹកថ្ងៃពុធ ១២រោច ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១១ ខែតុលា ឆ្នាំ២០២៣ បានអញ្ជើញចូលរួមពិធីបុណ្យកាន់បិណ្ឌវេនទី១២ នៅវត្តសិរីសន្ធរវង្សក្រចេះក្រុង ហៅវត្តក្រចេះ ដើម្បីឧទ្ទិសកុសលផលបុណ្យជូនដួងវិញ្ញាណក្ខន្ធលោកអ្នកមានគុណ បុព្វបុរសជាតិ យុទ្ធជន យុទ្ធនារី ដែលបានពលីមរណៈដើម្បីបុព្វហេតុជាតិមាតុភូមិទៅកាន់លោកខាងមុខ។

នៅក្នុងឱកាសនោះ ឯកឧត្តមកិត្តិនីតិកោសលបណ្ឌិត អុឹម ឈុនលឹម និងលោកជំទាវ រួមនិងក្រុមការងារ បានបូជាទៀន ធូប ផ្កាភ្ញី និងគ្រឿងសក្ការៈថ្វាយព្រះរតនត្រ័យ វត្ថុសក្ដិសិទ្ធក្នុងលោក សូមជួយតាមទេវតាថែរក្សាការពារ និងបន្តប្រារព្ធកិច្ចនមស្ការព្រះរតនត្រ័យ សមាទានសីល ពិធីរាប់បាត្រ និងវេរនូវវារកភត្ត ប្រចាំវេនទី១២ និងទេយ្យវត្ថុផ្សេងៗ ប្រគេនដល់ព្រះសង្ឃ និងបង្សុកូល និងការផ្សាយមេត្តា ឧទ្ទិសកុសលអានិសង្ឃ ជូនលោកអ្នកមានគុណ បុព្វបុរសជាតិ វីរៈជនជាតិ មន្ត្រីរាជការ ស៊ីវិល យុទ្ធជន យុទ្ធនារី ជាអ្នកមានគុណូប្បការៈចំពោះជាតិ និងប្រជាជនកម្ពុជា ដែលបានពលីនិងទទួលមរណភាព ដើម្បីការពារបុព្វជាតិមាតុភូមិ។

ក្នុងនោះដែរ ឯកឧត្តមកិត្តិនីតិកោសលបណ្ឌិត អុឹម ឈុនលឹម បានមានប្រសាសន៍សំណេះសំណាល និងបានគូសបញ្ជាក់ដែរថា ៖ វិស័យព្រះពុទ្ធសាសនា ជាសាសនារបស់រដ្ឋដែលប្រជាពលរដ្ឋទូទៅ តែងតែគោរពទៅតាមប្រពៃណី ទំនៀមទំលាប់ប្រពៃណីខ្មែរ និងនៅតាមទីវត្តអារាមនានា ដែលកកើតឡើងដោយសារប្រទេសជាតិមានសុខសន្តិភាព និងស្ថិរភាពនយោបាយ រួមនឹងការអភិវឌ្ឍន៍ និងវិនិយោគ លើគ្រប់វិស័យ ក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាល ហើយសម្រាប់ខេត្តចេះឃើញថា មានការរីកចម្រើនគួរឲ្យគត់សម្គាល់នូវវិស័យព្រះពុទ្ធសាសនា ឃើញថាប្រជាពុទ្ធបរិស័ទមានការគោរពនិងប្រណិបត្តិបានយ៉ាងខ្ជាប់ខ្ជួន និងបានចូលរួមកសាងទៅតាមសទ្ធាដោយជ្រះថ្លា ដែលទាំងអស់នេះ បង្ហាញឲ្យឃើញពីការរីកចម្រើនផ្នែកសេដ្ឋកិច្ច និងសុខសន្តិភាព ប្រជាពលរដ្ឋមានជីវភាពធូរធារ និងមានឱកាសបានធ្វើបុណ្យរួមគ្នាប្របកដោយស្នាមញញឹមភាពសប្បាយរីករាយ និងមានសុខសុវត្ថិភាពផ្លូវកាយ និងចិត្ត។

សូមបញ្ជាក់ថា ក្នុងពិធីវេនកាន់បិណ្ឌវេនទី១២នេះដែរ ឯកឧត្តមកិត្តិនីតិកោសលបណ្ឌិត អុឹម ឈុនលឹម និងលោកជំទាវ ព្រមទាំងក្រុមគ្រួសារ និងក្រុការងារ បានប្រគេននូវទេយ្យទាន គ្រឿងបរិក្ខា ព្រមទាំងបច្ច័យសរុបចំនួន ១១លាន៩សែនរៀល ៕