នាយឧត្តមសេនីយ៍ ឯក មនោសែន ទទួលស្វាគមន៍ដំណើរទស្សនកិច្ចរបស់គណៈប្រតិភូបណ្ឌិត្យសភានគរបាលកណ្តាលកូរ៉េនិងចុះហត្ថលេខាលើអនុស្សរណ:នៃការយោគយល់គ្នា លើកទី២

ភ្នំពេញ៖ ឯកឧត្តម នាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា នារសៀលថ្ងៃអង្គារ ទី១៧ ខែតុលា ឆ្នាំ២០២៣នេះ បានអញ្ជើញទទួលស្វាគមន៍ដំណើរទស្សនកិច្ចរបស់គណៈប្រតិភូបណ្ឌិត្យសភានគរបាលកណ្តាលកូរ៉េ ដែលបានអញ្ជើញមកទស្សនកិច្ចនៅបណ្ឌិត្យសភានគរបាលកម្ពុជា។

ក្នុងដំណើរទស្សនកិច្ចនេះ ឯកឧត្តមសហប្រធានគណៈអធិបតីជាប្រធានបណ្ឌិត្យសភានគរបាលនៃប្រទេសទាំងពីរ ក៏បានអញ្ជើញចុះហត្ថលេខាលើអនុស្សរណៈនៃការយោគយល់គ្នា ជាលើកទី២ ដើម្បីពង្រឹងទំនាក់ទំនងល្អបន្តទៀតរវាងបណ្ឌិត្យសភានគរបាលនៃប្រទេសទាំងពីរ ទាំងពេលបច្ចុប្បន្ននិងទៅអនាគត ពង្រឹងការងារកិច្ចសហប្រតិបត្តិការអន្តរជាតិនិងការផ្លាស់ប្តូរគ្នាទៅវិញទៅមកលើការងារទស្សនកិច្ចរបស់ថ្នាក់ដឹកនាំ ការងារបណ្តុះបណ្តាលមន្ត្រី និងគ្រូនគរបាលជាតិ។

ពិធីចុះហត្ថលេខាលើអនុស្សារណៈនៃការយោគយល់គ្នានេះ ត្រូវបានធ្វើឡើងរវាងឯកឧត្ដម ឧត្តមសេនីយ៍ត្រី អុី ជែយ៉ុង ប្រធានបណ្ឌិត្យសភានគរបាលកណ្តាលកូរ៉េនិងឯកឧត្តម នាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា។

ពិធីនេះ បានប្រព្រឹត្តទៅនៅសាលមហោស្រព(អគារ H)នៃបណ្ឌិត្យសភានគរបាលកម្ពុជា ដោយមានការអញ្ជើញចូលរួមពីសំណាក់សមាជិកគណៈប្រតិភូនៃបណ្ឌិត្យសភានគរបាលកណ្តាលកូរ៉េនិងថ្នាក់ដឹកនាំ សាស្ត្រាចារ្យ គ្រូនគរបាលជាតិ និងមន្ត្រីនៃបណ្ឌិត្យសភានគរបាលកម្ពុជា សរុបចំនួន២៤៣រូប ក្រោមបរិយាកាសរីករាយនិងស្និទ្ធស្នាលក្រៃលែង ៕