ឧត្តមសេនីយ៍ទោ សោម ស៊ុន នាំយកថវិកា និងអំណោយរបស់សម្តេចធិបតី ហ៊ុន ម៉ាណែត និងលោកជំទាវ ទៅចូលរួមពិធីបុណ្យសពពលរដ្ឋក្រីក្រ នៅឃុំបន្ទាយស្ទោង ស្រុកស្ទោង
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានក្រុមការងាររបស់រាជរដ្ឋាភិបាលចុះជួយមូលដ្ឋាន ឃុំបន្ទាយស្ទោង ស្រុកស្ទោង ខេត្តកំពង់ធំ នៅថ្ងៃទី១៨ ខែតុលា ឆ្នាំ២០២៣ បានដឹកនាំសហការី រួមជាមួយអាជ្ញាធរដែនដី នាំយកថវិកានិងអំណោយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ ពេជ ចន្ទមុន្នី ទៅចូលរួមក្នុងពិធីបុណ្យសពប្រជាពលរដ្ឋក្រីក្រចំនួន ៤ សព គឺ១ សពលោក រឿន ណារិទ្ធ ភេទប្រុស អាយុ៣៧ឆ្នាំនៅភូមិពន្លាជ័យ ទី ២សពលោកតា ហិម ហៃ អាយុ៦០ឆ្នាំ នៅភូមិស្រោមដែក ទី៣/ សពលោកតា តេង អ៊ក អាយុ៧១ឆ្នាំ នៅភូមិកុកគ្រួស
និងទី៤/សពលោកយាយ ភួង ផាន់ អាយុ៨១ឆ្នាំ នៅភូមិកុកគ្រួស ដែលបានទទួលមរណភាពនាពេលកន្លងទៅថ្មីៗ និងនៅថ្ងៃនេះ នៅក្នុងឃុំបន្ទាយស្ទោង ស្រុកស្ទោង ខេត្តកំពង់ធំ ។
ឧត្តមសេនីយ៍ទោ សោម ស៊ុន បានថ្លែងនូវការសោកស្តាយ អាឡោះអាល័យជាទីបំផុតចំពោះការបាត់បង់ ប្រជាពលរដ្ឋទាំង៤សព ដែលបានលាចាកលោកនេះទៅ និងបានបួងសួង សូមឱ្យវិញ្ញាណក្ខន្ធលោក លោកស្រី បានទៅកាន់សុគតិភព កុំបីឃ្លៀងឃ្លាតឡើយ។
ក្នុងឱកាសចូលរួមពិធីបុណ្យសពនេះ ឧត្តមសេនីយ៍ទោ សោម ស៊ុន និងសហការី បាននាំយកអំណោយរបស់ឯឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ទៅឧបត្ថម្ភជូនក្រុមគ្រួសារសពដោយក្នុង១គ្រួសារ ទទួលបាន ៖អង្ករ មីជាតិ ត្រីខកំប៉ុង និងថវិកាមួយចំនួនផងដែរ ។
លោកសូត្រ អ៊ុល មេឃុំ បន្ទាយស្ទោង ស្រុកស្ទោង ខេត្តកំពង់ធំ តំណាងឲ្យក្រុមគ្រួសារសព អជ្ញាធរដែនដី និងប្រជាពលរដ្ឋ នៅក្នុងឃុំ បានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្តេចមហាបវរធិបតី ហ៊ុន ម៉ាណែត និងលោកជំទាវ ព្រមទាំងឧត្តមសេនីយ៍ទោ សោម ស៊ុន រួមជាមួយថ្នាក់ដឹកនាំក្រុមការងាររបស់រាជរដ្ឋាភិបាលចុះជួយមូលដ្ឋានឃុំបន្ទាយស្ទោង ស្រុកស្ទោង ខេត្តកំពង់ធំ ដែលបានយកចិត្តទុកដាក់ជួយឧបត្ថម្ភក្នុងពិធីបុណ្យសព ដែលកំពុងមានការខ្វះខាតនេះ និងសូមគោរពជូនពរសម្ដេច លោកជំទាវ ឯកឧត្តម លោក លោកស្រីទាំងអស់សូមទទួលបាននូវពុទ្ធពរទាំង ៤ប្រការកុំបីឃ្លៀងឃ្លាតឡើយ៕
