ឯកឧត្តមរដ្ឋមន្រ្តី ចាយ បូរិន នាំយកអំណោយរបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ប្រគេនព្រះសង្ឃចំនួន ៨វត្ត នៅមូលដ្ឋានខេត្តតាកែវ

ភ្នំពេញ៖ ឯកឧត្តម ចាយ បូរិន រដ្ឋមន្រ្តីក្រសួងធម្មការ និងសាសនា នាព្រឹកថ្ងៃសុក្រ ទី២០ ខែតុលា ឆ្នាំ២០២៣ បាននាំយកអំណោយគ្រឿងឧបភោគ បរិភោគ និងបច្ច័យ ដ៏ថ្លៃថ្លារបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និង លោកជំទាវ បណ្ឌិត ពេជ ចន្ទមុនី មកប្រគេនវត្តចំនួន ០៨វត្ត ស្ថិតនៅក្នុងខេត្តតាកែវ។

ពិធីនេះក៏មានការនិមន្តអញ្ជើញចូលរួមដោយ ព្រះមហាវីរៈវង្សាចារ្យ ជ្រិន សិទ្ធ ព្រះមេគណគណៈធម្មយុត្តិកនិកាយខេត្តតាកែវ, ព្រះគ្រូរតនៈមេធា ទឹម សុវត្ថា ព្រះធម្មធរគណមហានិកាយខេត្ត, ព្រះញាណសោភ័ណ យន វាសនា ព្រះបាឡាត់គណខេត្តតាកែវ និងព្រះមន្រ្តីសង្ឃ ព្រមទាំង ឯកឧត្តម អ៊ូច ភា អភិបាល នៃគណៈអភិបាលខេតកតតាកែវ លោក ជួង វ៉ាន ប្រធានមន្ទីរធកម្មការ និងសាសនាខេត្ត និង លោក កង អាណាន់ អភិបាលក្រុងដូនកែវ និង លោកតា លោកយាយ ពុទ្ធបរិស័ទ្ធចូលរួមជាច្រើនកុះករផងដែរ។

នៅក្នុងឱកាសប្រកបដោយបីតិសោមនស្សជ្រះថ្លានេះដែរ ឯកឧត្តម ចាយ បូរិន បានប្រគេននូវទេយ្យទាន គ្រឿងឧបភោគ បរិភោគ រួមមានអង្ករសរុប ៦,០០០គីឡូក្រាម ស្មើរនឹង៦តោន និងបច្ច័យ ដែលជាសទ្ធាជ្រះថ្លារបស់ សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដល់វត្តចំនួន០៨ ក្នុងមូលដ្ឋានខេត្តតាកែវ ដើម្បីចូលរួមចំណែកទ្រទ្រង់វិស័យព្រះពុទ្ធសាសនាកាន់តែរីកចម្រើនទ្វេរឡើងថែមទៀត ៕